La Citât di Codroip, in colaborazion cu la Agjenzie Regjonâl pe Lenghe Furlane (ARLeF), la Societât Filologjiche Furlane, l’Istitût Ladin Furlan Pre Checo Placerean e l’Ent Friûl tal Mont, e bandìs il concors par assegnâ il Premi Leterari in lenghe furlane «San Simon», 46e edizion, dedicât a la memorie dal inzegnîr Agnul M. Pitane, par une Racuelte di contis e par une Traduzion.

RACUELTE DI CONTIS: lis oparis a varan di sei scritis doprant no mancul di 120.000 caratars, contant ancje i spazis. Al autôr o ai autôrs da la racuelte di contis che la Jurie e varà sielzût i larà un Premi di € 1.500,00, e une targhe di ricuart.

TRADUZION DI UNE CONTE: i partecipants a varan di presentâ une traduzion in lenghe furlane da lis contis di Elio Bartolini “Villa veneta”, che si cjate in “I racconti di Elio Bartolini”, Casamassima Libri, 2007 e “Tornato per votare”, che si cjate in “Affari friulani del sabato sera e altri racconti”, Bottega Errante, 2016. Al autôr o ai autôrs da la traduzion che la Jurie e varà sielzût i larà un Premi di € 1.000,00, e une targhe di ricuart.

Dut al varà di rivâ dentri di misdì di lunis ai 30 di Jugn dal 2025 li dal Ufici Protocol dal Comun di Codroip.

La Aministrazion comunâl, daûr da la propueste da la Jurie, e podarà decidi di publicâ lis oparis premiadis. Cun di plui, la organizazion e intint promovi la difusion dai elaborâts calcolâts plui meritevui di atenzion.

La proclamazion dai vincidôrs par dutis dôs lis sezions dal bant si le fasarà tal dì di Sant Simon, martars ai 28 di Otubar dal 2025.

Dutis lis informazions e i tescj di voltâ si cjatin tal bant in zonte e tal sît dal Comun di Codroip.