Josef Marchet

Predi, insegnant, linguist, storiograf, leterât, storic e critic di art

(Glemone 1902 - Udin 1966)

Daspò di vê cjapât la lauree in teologjie, tal 1935 si indotorà in Letaris classichis e modernis ae Catoliche di Milan. Al insegnà Letaris tal Seminari, tal Liceu Classic e tal Istitût Magjistrâl di Udin e a Tumieç.

Tal 1944 al fo mandât al confin politic fassist e daspò de vuere al fo l'ispiradôr dal grup poetic Risultive.

Par agns al fo la anime dal ferbint setemanâl "Patrie dal Friûl", unic periodic publicât dut par furlan, che al sostignive la autonomie regjonâl intun ambient pal plui contrari.

Dal 1961 fin ae muart, al à ancje direzût la riviste "Sot la nape".

Al à scrit une gramatiche fondamentâl de lenghe furlane; al à "scuvierte" la sculture furlane in len ; al à tornât a lei la storie regjonâl cence condizionaments e prejudizis nazionalistics. Ancje se nol fo un artist pûr, al à scrit intun furlan esemplâr: nissun, ni prin ni daspò, al à paronât la lenghe tant che lui.

Si à di vê iniment fra lis sôs oparis plui impuartantis:

• Lineamenti di grammatica friulana, Udin 1952 e 1967
• G. M. e G. Nicoletti, La scultura lignea in Friul, 1956
• Friuli. Uomini e tempi, Udin 1959 e 1974
• Lis predicjis dal muini, Udin 1965
• Cuintristorie dal Friûl, Udin 1974