Editorie, associazionisim e produzion culturâl

No esist une editorie “dome” par furlan, cu la ecezion parziâl de cooperative Serling, che e je specializade inte produzion di materiâi di linguistiche e di linguistiche aplicade, ma dome cjasis editoris che a publichin “ancje” par furlan. In chest contest e merete ricuardade la  KappaVu, che tal so catalic di passe trente agns si regjistre la incidence plui alte di libris par furlan, de narative ae poesie e ae sagjistiche fint al materiâl didatic e ai progjets editoriâi par fruts e par fantats. Publicazions par furlan di gjenar diferent – de narative ae sagjistiche – si cjatin ancje tal catalic di altris cjasis editoris, tacant di Forum, Campanotto, Leonardo e L'orto della cultura.

Chel editoriâl al è un dai cjamps di azion de plui part des associazions culturâls, impegnadis inte promozion de lenghe e de culture furlanis, tacant de Societât Filologjiche Furlane, che e esist di passe cent agns e e opere in cetancj setôrs.

Altris sogjets che la impuartance de lôr ativitât e je ricognossude ancje in tiermis formâi a son la cooperative Informazione Friulana, che e je la editore di Radio Onde Furlane, la clape di culture Patrie dal Friûl, che e e da fûr il periodic cun chel ste non, la Societât Sientifiche e Tecnologjiche Furlane (SSeTF), impegnade tal ûs e te promozion de lenghe furlane intal cjamp de informazion e de divulgazion sientifichis, e lis associazions Glesie Furlane, Istitût Ladin-Furlan “Pre Checo Placerean”, La Grame e Colonos.

La lenghe furlane e ven doprade con risultâts interessant in diviers setôrs de art e de creativitât, de leterature al teatri, de musiche ae produzion audiovisive.

La vivarositât e la cualitât de produzion culturâl a son cressudis une vore, ancje in gracie de ativitât di comunicazion par radio e in rêt o de la organizazion di events e rassegnis, tacant dal Premi Friûl, de Mostre dal Cine Furlan e di diviers concors leteraris e teatrâi, par rivâ a Suns Europe, il festival european des arts in lenghe minorizade, che al ven inmaneât in Friûl dal 2015.

La cualitât e la varietât de produzion culturâl par furlan si è zovade ancje de nassite e de azion di struturis propriis di agregazion, di produzion, di promozion e di distribuzion. Al è il câs di cjasis discografichis tant che Nota e Musiche Furlane Fuarte, di societâts di produzion audiovisive tant che Raja Films e Agherose e di esperiencis tant che la Associazion Teatrâl Furlane e che, inviade che nol è tant, dal Teatri Stabil Furlan. 

In tantis ocasiosn, massime tai cjamps de musiche e dal audiovisîf, lis produzions par furlan si son fatis cognossi e preseâ ancje fûr dal Friûl. La lôr cualitât e almancul in cualchi câs ancje la lôr innomine a àn à zovât a chel che il sociolic Claudio Melchior al à clamât “sbalç culturâl” dal furlan e al so recupar di spazis e di ricognossiment di valôr inte societât furlane dal dì di vuê.