Parê dal Consei di Aministrazion dai 28.10.2016
Fat bon dal Senât Academic dai 25.10.2016
Decret Retorâl di emanazion numar 617 dai 31 di Otubar dal 2016

Art. 1 - Istituzion

1. Li de Universitât dal Friûl al ven istituît, daûr dal art. 25 come 3 dal Statût, il Centri clamât “Centri Interdipartimentâl pal svilup de lenghe e de culture dal Friûl – CIRF”, di chi indenant "Centri".
2. Il Centri, che si presente tant che Centri interdipartimentâl, al nas daûr de propueste e de adesion di chescj Dipartiment (di ca indenant clamâts “Dipartiments di riferiment”) e al à sede in spazis specifics indicâts tes deliberazions di adesion:
   • Dipartiment di Lenghis e leteraturis, comunicazion, formazion e societât (DILL)
   • Dipartiment di Siencis agroalimentârs, ambientâls e a animâls (DI4A)
   • Dipartiment di Siencis economichis e statistichis (DIES)
   • Dipartiment di Siencis juridichis (DISG)
   • Dipartiment Politecnic di inzegnarie e architeture (DPIA)
3. Il Centri al è stât istituît cun deliberazion di Consei di Aministrazion dal 28.10.2016, cjapât sù il parê dal Senât Academic dal 25.10.2016.

Art. 2 - Finalitâts

1. Finalitâts dal Centri a son:
   • a) promovi iniziativis par valorizâ il studi e la ricercje su lenghe, leterature, arts, sience, teritori e culture dal Friûl, cun riferiment in particolâr ae popolazion che e je a stâ te regjon e ai furlans tal forest che si identifichin cun cheste culture;
   • b) svilupâ rapuarts di colaborazion cun istituzions nazionâls, forestis e internazionâls;
   • c) fâ ativitâts di consulence e ricercje a pro di ents e istitûts;
   • d) promovi, sostignî e organizâ, ancje in colaborazion cui Dipartiments, ativitâts didatichis tant che cors di perfezionament e di inzornament su lenghe e culture dal Friûl, cun riferiment massime aes aministrazions publichis e ai ents teritoriâi;
   • e) prudelâ midiant di publicazions, cunvignis, seminaris e mostris, la difusion des cognossincis su lenghe e culture dal Friûl e slargjâ tes formis plui oportunis la cognossince des ativitâts dal Centri o des altris struturis de Universitât che a vedin afinitât cui obietîfs dal Centri stes;
   • f) promovi e prudelâ tal cuarp students dal Ateneu iniziativis indreçadis ae cognossince e al ûs de lenghe furlane, cun atenzion particolâr ai gnûfs struments comunicatîfs, aes espressions artistichis, musicâls, teatrâls, espressivis e vie indenant.

Art. 3 – Adesions

1. 1. A puedin mandâ domande di adesion al Centri:
   • a) altris Dipartiments de Universitât dal Friûl (di pronte a chei di riferiment), daspò vê vude la deliberazion dal Consei di Dipartiment, indulà che a vegnin segnadis lis motivazions de richieste di adesion;
   • b) professôrs e ricercjadôrs de Universitât dal Friûl;
   • c) studiôs e esperts esternis;
   • d) Ents, istituzions o associazions che a son interessadis aes ativitâts dal Centri, che i dan un apuart significatîf e che a àn fat domande di adesion.
2. Il Consei Diretîf al delibere in rivuart aes domandis di adesion, acompagnadis, pai sogjets aes let. c) e d) dal come sore ripuartât, dal curriculum sientific pes domandis ae let. d) e di cualsisei altri document ritignût util.
3. La decjadence e jentre in vore daurman par vie de decision di bande dal Consei Diretîf, tal câs di domande dal interessât o par altre ipotesi ricognossude dai orghins di guvier dal Ateneu.

Art. 4 – Orghins

1. I orghins dal Centri a son:
   • a) il Diretôr
   • b) il Consei Diretîf
   • c) la Zonte
   • d) il Comitât Sientific
   • e) la Assemblee dai aderents

Art. 5 – Diretôr

1. Il Diretôr al coincît cul Delegât dal Retôr pal furlan; la durade dal mandât tant che Diretôr dal Centri e je duncje la stesse de durade de deleghe dade dal Retôr.
2. Tal câs che al mancji il Delegât, il Diretôr al ven elet dal Consei Diretîf jenfri i propris membris internis dal Ateneu.

Art. 6 – Funzions dal Diretôr

1. A son compits dal Diretôr:
   • a) clamâ lis riunions dal Consei Diretîf, fasintjur di president, almancul dôs voltis par an e dutis lis voltis che lu riten just;
   • b) designâ jenfri i components dal Consei Diretîf il Vice Diretôr, incargât di sostituîlu;
   • c) rapresentâ il Centri tai rapuarts cu lis autoritâts academichis, cui orghins di guvier de Universitât e cu lis istituzions dal difûr de Universitât;
   • d) stâ daûr aes ativitâts leadis ae gjestion aministrative e contabil dal Centri e cjapâ lis decisions di sô competence par chel che al inten chestis materiis;
   • e) meti in vore lis deliberazions dal Consei Diretîf;
   • f) scrivi ogni an la relazion su la ativitât dal Centri di someti ae aprovazion dal Consei Diretîf, di mandâ ai Dipartiments aderents.

Art. 7 – Consei Diretîf

1. Il Consei Diretîf, cun a cjâf il Diretôr, al è metût dongje, cun di plui dal Diretôr stes, di un rapresentant par ogni Dipartiment aderent, designât dal Consei stes dal Dipartiment, e ancje di un rapresentant elet dai aderents “esternis” ai rûi dal Ateneu.
2. Il Consei al dure in carghe trê agns academics. I components si puedin tornâ a elei.
3. Tal câs di cessazion anticipade di un component dal Consei, il Diretôr al invide il Diretôr dal Dipartiment interessât a fâ une gnove nomine o ben al clame dongje i aderents biel prest, par la gnove elezion.

Art. 8 – Funzions dal Consei Diretîf

1. Lis funzions dal Consei Diretîf a son:
   • a) davuelzi lis funzions di indreçament, programazion e coordenament des ativitâts dal Centri, di là de verifiche de ativitât davuelte;
   • b) fâ bogns i programs dal Centri;
   • c) deliberâ su lis domandis di finanziament;
   • d) deliberâ in merit de relazion anuâl su la ativitât dal Centri, predisponude dal Diretôr dal Centri stes;
   • e) nomenâ i components de Zonte e dal Comitât Sientific;
   • f) deliberâ su lis domandis di adesion;
   • g) autorizâ lis spesis;
   • h) proponi ai orghins preponûts la stipule di convenzions;
   • i) proponi ai orghins preponûts la modifiche di chest Regolament;
   • j) deliberâ sul dissiolziment dal Centri, secont ce che al è proviodût al art. 16.

Art. 9 – La Zonte

1. La Zonte, dade dongje di trê membris, nomenâts dal Consei Diretîf jenfri i siei components internis al Ateneu, e à tant che president il Diretôr e e ven rinovade ogni an.

Art. 10 – Funzions de Zonte

1. Lis funzions de Zonte a son:
   • a) esprimi parê preventîf su lis domandis di adesion;
   • b) esprimi parê preventîf su lis domandis di finanziament;
   • c) davuelzi altris funzions delegadis dal Consei Diretîf.

Art. 11 – Comitât Sientific

1. Il Comitât Sientific al è dât dongje di cinc membris, nomenâts dal Consei Diretîf. Dal Comitât a puedin fâ part ancje i aderents “esternis” ai rûi dal Ateneu.

Art. 12 – Assemblee dai aderents

1. La Assemblee di ducj i aderents si da dongje almancul une volte par an e e à tant che president il Diretôr. 
2. A son Aderents “esternis” i Ents, lis istituzions o ognidun dai studiôs dal difûr dal Ateneu, che a son interessâts aes ativitâts dal Centri, i dan un apuart significatîf e a àn domandât di aderî, daspò vê vude conferme di bande dal Consei Diretîf.

Art. 13 – Gjestion patrimoniâl

1. Il Centri al lavore tai spazis individuâts tes deliberazions istitutivis o metûts a disposizion di un dai Dipartiments di riferiment o pûr di altris struturis che a aderissin a Centri, daûr dal art. 3 come 1 di chest Regolament.
2. La responsabilitât pai bens assegnâts e je in cjâf al Diretôr dal Centri.

Art. 14 – Risorsis finanziariis

1. Il Centri al gjestìs in autonomie i fonts metûts a sô disposizion di bande dai Dipartiments o pûr cjatâts fûr midiant di finanziaments publics e privâts.
2. Il Diretôr dal Centri si cjape la responsabilitât dai ats imputabii al Centri stes, dentri dai limits de sô competence. I ats che a van di là di chescj limits, daspò vê valutât la regolaritât aministrative, a vegnin firmâts dal Diretôr Gjenerâl.

Art. 15 – Personâl

1. Il Centri al lavore zovantsi di personâl tecnic e aministratîf metût a disposizion dal Diretôr Gjenerâl.

Art. 16 – Dissolviment e trasformazion

1. Tal câs che il Consei Diretîf al deliberi, cu la maiorance di doi tierç dai siei components, di disfâ il Centri, la deliberazion e à di jessi sometude ae aprovazion dal Consei di Aministrazion, daspò vê sintût il parê dal Senât Academic.

Art. 17 – Jentrade in vore

1. Chest Regolament, fat bon dal Senât Academic, al jentre in vore de date segnade tal Decret di emanazion dal Retôr.