Il furlan in dì di vuê

Une lenghe che e va ancjemò dilunc a patî i efiets di une minorizazion lungje e penze e che, cundut achel, e je vive, vivarose e resistente. La situazion de lenghe furlane si podarès definîle cun chestis peraulis. Di une bande, no si pues fâ di mancul di tignî cont di cemût che, vie pal ultin secul / secul e mieç, daûr di une schirie di dinamichis culturâls, sociâls, economichis e politichis, e je stade escludude di cetantis formis di comunicazion e i son stâts gjavâts cetancj spazis inte cuotidianitât de int, che propit par chel in tancj câs si è cjatade tes cundizions di jessi “libare” di scugnî no doprâle e fintremai di scugnî no passâle di une gjenerazion a di chê altre. Di chê altre, al merete marcât il fat che une part de popolazion di lenghe furlane e je lade dilunc a doprâle, inte vite di ogni dì e in tancj setôrs: un ûs de lenghe naturâl e spontani, che in tancj câs al è stât – e al è ancjemò in dì di vuê – une maniere par ricognossi in tiermins simbolics e concrets la sô impuartance e salacor ancje par fâ indenant la rivendicazion esplicite dal so ricognossiment formâl e de garanzie dal dirit di doprâle “tant che lenghe”, in maniere “normâl”, cence limitazions o prejudizis.

Ancjemò in dì di vuê, daûr di ce che al salte fûr dai scandais plui resints, la lenghe furlane e ven doprade di plui de metât de popolazion dal Friûl: di 550 mil a 650 mil di lôr. Cun di plui a son almancul altris 250 mil che no le fevelin ma a son in stât di capîle.

Massime vie pai ultins agns, tacant de fin dal secul stât fintremai al dì di vuê, la lenghe furlane e je stade recuperade de bande de int.  Lu mostre a clâr une ricercje sociolinguistiche, fate tal 2014 e che i siei risultâts a son stâts publicâts tal 2017, di dulà che al salte fûr che al è lât al mancul chel sens di imbaraç e fintremai di vergogne – une sorte di stigme sociâl – che magari cussì no al marcave il furlan e al condizionave so ûs.

Chel scandai al mostre che, in dì di vuê, la lenghe furlane e ven calcolade de plui part di lôr no dome tant che alc di “normâl” e di “no problematic”, ma ben ancje tant che alc di “speciâl”, di “moderni”, di “gnûf” (dopo che par tant timp il furlan al è stât fat passâ par alc di “vieri” e fintremai “cence utilitât” e “cence avignî”). Chest ategjament al ven palesât in particolâr de bande dai plui zovins, che a tornin a discuvierzi e a doprâ il furlan.

Une ande di cheste fate si le viôt ancje tra popolazion imigrade, no dome chê di divignince foreste, che di une bande e je plui usade a contescj multilengâi e di chê altre e à une dibisugne plui fuarte di integrazion, ma ancje i citadins talians che a rivin di altris regjons, che in passât ancje par resons professionâls (militârs, funzionaris publics e insegnants) a mostravin dispès une cierte ostilitât.

Une piçule testemoneance di cheste gnove tindince si pues cjatâle inte esperience de compre dal biliet dal tren inte stazion di Udin: fin a vincjecinc agns indaûr al sarès stât scuasi impussibil che cualchidun al fevelàs par furlan cul operadôr dal sportel e se lu ves fat al varès vût tant che rispueste un invît, magari nancje masse zentîl, a fevelâ par talian; intai ultins agns, invezit, al sucêt cuntune cierte frecuence che al vegni domandât il biliet par furlan e par solit la disposizion dal personâl no je ostîl e dispès ancje la sô rispueste e je in chê lenghe.

Il dut si insuaze in chei mudaments sociâi di dimensions continentâls e planetariis che a àn tocjât in maniere particolarmentri significative il Friûl e la sô int, che tai ultins trê decenis si son cjatâts a jessi tal centri de Europe, dope che par tant timp a jerin dome che perifarie e frontiere dal Stât talian. In chest contest si insuaze ancje la normative regjonâl e statâl di tutele, che nol è un câs che ancje chê e esist dome tacant dai agns Novante dal secul stât.

Cundut che la sô metude in vore e risulte ancjemò limitade e parziâl, cemût che al è stât marcât ancje intai monitoraments fats de bande dai esperts che par Cont dal Consei de Europe a verifichin   in ce maniere che il Stât talian al rispiete i impegns cjapâts sù cu la firme e cu la ratifiche de Convenzion Cuadri pe Protezion des Minorancis Nazionâls, il mudament dal ategjament de plui part de int viers de lenghe furlane e chel de sô situazion al diven ancje de normative che le ricognòs in tiermins formâi e che e proviôt e che e saponte il so ûs intes scuelis, intai media e inte vite publiche.