La Storie

“E je istituide, tacant dal an academic 1977-1978, la Universitât statâl di Udin, che i siei cors di lauree a saran inviâts a scomençâ dal an academic 1978-1979. La Universitât dal Friûl e à tant che obietîf chel di contribuî al progrès civîl, sociâl e ae rinassite economiche dal Friûl e di deventâ strument organic di disvilup e di rinovament dai filons origjinaris de culture, de lenghe, des tradizions e de storie dal Friûl”.

(art. 26, leç 546/1977)

La nassite dal CIRF

Il CIRF, fondât tal 1995, al è nassût tant che imprest operatîf de Universitât dal Friûl cun chê di meti in vore l'articul 26 de Leç 546/1997, istitutîf dal Ateneu furlan, indulà che si marcave che a chel i spietave - jenfri chei altris - il compit speciâl di "contribuî al progrès civîl, sociâl e ae rinassite dal Friûl (...) e al rinovament dai filons origjinaris de sô culture".

I dipartiments fondadôrs a jerin: Lenghis e Leteraturis Gjermanichis e Romanzis, Economie, Societât e Teritori, Siencis Storichis e Documentariis e Lenghis e Leteraturis, Comunicazion, Formazion e Societât. 

Daûr dal Regolament origjinari, lis ativitâts dal CIRF a vevin di lâ daûr di chescj principis e obietîfs:

• promovi, davuelzi e coordenâ ativitâts di ricercje pal studi de lenghe, storie, culture, societât, economie e de art dal Friûl e des comunitâts di divignince furlane tal forest;
• meti in vore iniziativis pal svilup de culture e de lenghe dal Friûl previodudis de Leç Regjonâl n. 15/1996 e modificazions seguitivis e altris leçs nazionâls e regjonâls;
• meti in vore iniziativis di studi, di ricercje e di formazion par dutis lis areis di lenghe e culture ladine dal Cjadovri, dal Trentin, dal Sud Tirôl e dai Grisons, in mût di deventâ element di riferiment sientific par une vaste aree alpine leade di carateristichis culturâls e linguistichis comuns o someantis;
• promovi iniziativis di colegament jenfri i docents di leterature e di linguistiche ladine e di chei altris setôrs di ricercje comprendûts ae letare a) di chest articul, docents che a lavorin in Italie e ancje tal forest;
• promovi, poiâ e inmaneâ ativitâts didatichis specialistichis tant che cors di perfezionament, inzornament, formazion, specializazion, dotorât;
• prudelâ, midiant di publicazions, cunvignis, seminaris e mostris, la promozion de lenghe e de culture furlane;
• fâ ativitâts di consulence e di ricercje a pro di ents e istituzions;
• slargjâ inte maniere miôr la cognossince des ativitâts di ricercje metudis in vore dal Centri o des altris struturis de Universitât;

I ambits specifics di intervent dal CIRF a jerin i stes risiervâts di norme ae Universitât, ven a stâi ricercje e didatiche, cuntune programazion che e previodeve intervents di meti in vore daurman o cuntune prospetive di disvilup plui lungje tal timp.

Cun riferiment ae didatiche, te ativitât dal CIRF a jentravin dentri ancje i cors di formazion e inzornament in lenghe e culture furlane pai insegnants (scuele de infanzie, primarie e secondarie).

Cun di plui, a vignivin metûts adun ancje cors di formazion pai dipendents de Aministrazion publiche, finanziâts daûr de leç 482/1999 e in vore ancjemò in dì di vuê.

Cul lâ dal timp, a son stadis inmaneadis altris iniziativis formativis e didatichis.

Al è il câs, tra il 1998 e il 2000, inte suaze di une azion strategjiche inmaneade di chel che in chê volte al jere l'organisim di politiche linguistiche pe lenghe furlane (OLF, osservatori su la lenghe e la culture furlanis), dai cors par insegnants, tradutôrs, lessicolics, lessicografs e gjornaliscj in lenghe furlane. 

La evoluzion dal CIRF

Tal 2001 il CIRF al è deventât orghin tecnic di coordenament jenfri i docents e i ricercjadôrs de Universitât di Udin interessâts al disvilup di ricercjis su la culture e su la lenghe dal Friûl. Tai agns, a àn aderît al CIRF plui di une cincuantine di studiôs.

I siei orghins a son la Assemblee dai Aderents, il Consei Diretîf e il Diretôr. La adesion e je vierte ancje ai studiôs di altris Universitâts talianis e forestis, e ancje a esperts che no son academics.

Tai prins agns di ativitât il CIRF al à promovût cualchi ricercje direte, al à publicât cualchi lavôr e fat ativitât di consulence par cetantis istituzions. Nome tal 2000, in gracie dal Consorzi Universitari dal Friûl, si è indotât dai mieçs materiâi e des risorsis umanis che a coventavin par une operativitât plene.

Tal 2016, il CIRF al à cambiât denominazion, deventant Centri Interdipartimentâl pal Svilup de Lenghe e de Culture dal Friûl. In cheste ocasion, al è stât tornât a viodi il regolament interni, li che a vegnin fissâts tant che obietîfs dal Centri:

• promovi iniziativis pe valorizazion dal studi e de ricercje su lenghe, leterature, arts, sience, teritori e culture dal Friûl, soredut par chel che al inten la popolazion che e je a stâ in regjon e ai furlans tal forest che si identifichin cun cheste culture;
• disvilupâ rapuarts di colaborazion cun istituzions nazionâls, forestis e internazionâls;
• fâ ativitât di consulence e di ricercje a pro di ents e istituzions;
• promovi, poiâ e inmaneâ, ancje in colaborazion cui Dipartiments, ativitâts didatichis tant che cors di perfezionament e di inzornament su la lenghe e la culture dal Friûl, massime cun riferiment aes aministrazions publichis e ai ents teritoriâi;
• favorî midiant di publicazions, cunvignis, seminaris e mostris, la difusion des cognossincis su la lenghe e su la culture dal Friûl e slargjâ tes formis plui justis la cognossince des ativitâts dal Centri o di altris struturis de Universitât che a vedin obietîfs simii a chei dal Centri stes;
• promovi e prudelâ tal cuarp students dal Ateneu iniziativis che a smirin ae cognossince e al ûs de lenghe furlane, cun atenzion soredut ai gnûfs struments comunicatîfs, aes espressions artistichis, musicâls, teatrâls, espressivis, e vie indenant.

Par chel che al inten la didatiche, il CIRF al promôf dai cors ciclics di formazion in lenghe furlane risiervâts ai dipendents de Aministrazion publiche. 

Intai timps plui resints, a son stâts inviâts cors gnûfs par students e cors su la politiche linguistiche e la normative di tutele pai aministradôrs locâi (in colaborazion cu la ACLIF - Assemblee de Comunitât Linguistiche Furlane).