Normative
Ve chi une selezion de normative di riferiment in cont de tutele de minorance linguistiche furlane e de promozion de lenghe furlane, tra Stât, Regjons e istituzions europeanis.
La selezion e cjape dentri, prin di dut, i principis di fonde che si cjatin tai articui 2, 3 e 6 de Costituzion de Republiche Taliane e l'articul 3 dal Statût de Regjon Autonome Friûl- Vignesie Julie. Cun di plui a son la Leç 482/1999, il prin proviodiment statâl dedicât ae tutele des minorancis, il test storic de L.R. 29/2007 de Regjon Autonome Friûl- Vignesie Julie e un estrat de L.R. 73/1994 de Regjon dal Venit. Cundut che no je plui in vore, si pues lei ancje il test de L.R 15/1996 de Regjon Autonome Friûl- Vignesie Julie, il prin proviodiment regjonâl organic dedicât ae lenghe furlane.
Cjalant in direzion de dimension europeane, a vegnin presentâts ancje i articui 21 e 22 de Cjarte dai dirits fondamentâi de Union Europeane e i tescj des dôs convenzions dal Consei de Europe: la Cjarte Europeane des Lenghis Regjonâls o Minoritariis e la Convenzion cuadri pe protezion des minorancis nazionâls.
Par visâsi de lenghe furlane tant che patrimoni di ducj, tant che dirit di fonde e tant che oportunitât culturâl, educative, sociâl e fintremai economiche.
Par visâsi che i dirits linguistics a fasin part ad in plen dai dirits umans fondamentâi.
Par visâsi che la tutele des minorancis e je un principi democratic e une risorse pe coesion sociâl, pe convivence civîl e pe integrazion europeane.