I media
Intai ultins vincj agns e je cressude, in tiermins cuantitatîfs e cualitatîfs, ancje la presince de lenghe furlane intai mieç di comunicazion. In chest contest al è ben fâ une distinzion tra media in lenghe furlane (o pe plui part in lenghe furlane) e media par talian là che a figurin ancje articui, pagjinis, rubrichis o programs par furlan.
Ae prime categorie a apartegnin la emitente radiofoniche Radio Onde Furlane, che dal 1980 e fâs informazion, comunicazion, culture e intratigniment par furlan par almancul il 70% de sô programazion, e il storic mensîl monolengâl di informazion La Patrie dal Friûl.
La radio, fint de sô fondazion, e je stade simpri «plui che une radio» – un laboratori di creativitât e un centri di agregazion e di promozion culturâl che e à influît in maniere significative e positive sul corpus e sul status de lenghe, no dome cu la ativitât radiofoniche, ma ancje cun produzions audiovisivis, editoriâls e musicâls, progjets televisîfs e multimediâls e iniziativis di linguistiche aplicade – e intai ultins vincj agns e à consolidât la sô posizion, in gracie ancje dal potenziament dal propri segnâl analogjic e soredut de sô presince in internet, tra sît, streaming, podcast e social media. Ancje La Patrie dal Friûl e à infuartît la sô presince inte comunitât furlane. Cun di plui e je presint in maniere significative in rêt e i corispuint la pagjine Facebook in lenghe furlane che e esist di plui timp.
Altris esperiencis di media fûr par fûr par furlan a son il periodic di informazion freepress Il Diari, dât fûr in diviersis formis tra il 2005 e il 2013, e la riviste par fruts Alc&cè!, distribuide in maniere periodiche intes scuelis in zonte dal setemanâl La Vita Cattolica.
Il disvilup di internet al à zovât ae difusion de lenghe furlane, cu la creazion di cetancj sîts, blogs, pagjinis e grups di Facebook.
Contignûts in lenghe furlane a son ancje disponibii, a ben che in cuantitât limitade, ancje in diviers mieçs di comunicazion par talian. Alc dal gjenar al sucêt ogni tant sul cuotidian principâl di chenti, Il Messaggero Veneto, là che timp indaûr si cjatave sù par jù une volte al mês une pagjine curade de Societât Filologjiche Furlane, e tant plui da râr su la edizion di Udin da Il Gazzettino, intant che nuie dal gjenar al sucêt su Il Piccolo, cuotidian triestin difondût ancje intal Friûl Orientâl e in part de Basse Furlane. E je plui siore la situazion dai media de Diocesi di Udin (Radio Spazio 103, cun cualchi program, e il setemanâl La Vita Cattolica, cu la Pagjine Furlane), dal setemanâl Il Friuli e de Voce Isontina, setemanâl diocesan di Gurize, che e propon une pagjine in furlan une volte al mês.
Tes emitentis televisivis locâls privadis la lenghe furlane si le cjate avonde pôc, fale intal câs di programs sostignûts di finanziaments publics (par esempli chel par fruts clamât Maman!), e e je presinte in maniere limitade – disot dal soiâr minim di ce che al è previodût de Leç 482/1999 e dal so regolament di atuazion e cence chês struturis organizativis e redazionâls che la concessionarie dal servizi public radiotelevisîf e garantìs par altris minorancis linguistichis – inte programazion regjonâl de Rai, cu la rubriche radiofoniche Vuê o fevelìn di… e cun cualchi episodiche propueste televisive.