Scuele e Universitât
Cu la jentrade in vore prime de L.R.15/1996 e po de Leç 482/1999 dal so Regolament di atuazion, il D.P.R. 345/2001, la lenghe furlane e je jentrade in maniere uficiâl intes scuelis. Cundut de metude a disposizion de bande de Regjon di contribûts specifics a pro des istituzions scolastichis e dal obietîf declarât de leç statâl, che e previôt – almancul intes scuelis de infanzie, primariis e secondariis di prin grât – l'insegnament, l'aprendiment e l'ûs des lenghis des minorancis linguistichis storichis, magari cussì no la sô presince inte ufierte formative e je ancjemò precarie e di tindince “sperimentâl”. In chest contest a son stâts inviâts cetancj progjets didatics, massime tes scuelis de infanzie e tes primariis.
Scuele secondarie
Intes scuelis secondariis di secont grât la presince de lenghe furlane e je ancjemò plui limitade, stant che no ven garantide par leç, ancje se a son in vore progjets sperimentâi di buine cualitât e che il lôr impat al è daûr a cressi, in gracie de ativitât metude adun di un trop di insegnants, ancje cu la colaborazion dal CIRF, inte suaze de rêt La Lavagne Plurilengâl. Intes scuelis secondariis di prin e di secont grât si sperimentin ancje ativitât di CLIL.
Universitât
La lenghe e la leterature furlanis a son za di timp ogjet di insegnament (par talian) intes universitâts dal Friûl e di Triest. Intal 1995 la Universitât dal Friûl si à indotade di un Centri interdipartimentâl specific, il CIRF, che lant daûr di ce che al previôt la leç istitutive dal Ateneu ,e e je impegnade in diviersis iniziativis di ricercje, di didatiche e di formazion linguistiche. Vie pal so prin cuart di secul di vite al à inmaneât cors di formazion e inzornament in lenghe furlane par gjornaliscj, tradutôrs, lessicolics e insegnants e al va dilunc a fâ cors di furlan pai dipendents des aministrazions publichis e pai students.
Formazion dai insegnants
La Universitât dal Friûl e à inmaneât ancje altris iniziativis formativis specifichis pai insegnants: un Cors di 400 oris di formazion e inzornament par insegnants “di” e “in” lenghe minoritarie (furlan, sloven e todesc) e un Cors di inzornament par insegnants/Master di II nivel “Insegnâ in lenghe furlanis”, di 800 oris.