Sportel pe lenghe furlane

Il Sportel pe Lenghe Furlane de Universitât dal Friûl, inviât in gracie dai finanziaments de Leç 482/1999, pe tutele des minorancis linguistichis storichis, al à chê di doprâ la lenghe furlane inte comunicazion dal Ateneu e di promovi la lenghe e la culture furlane in dutis lis sôs espressions vivis e vivarosis.

In plui dal servizi indreçât al public, il sportel al ufrìs la sô consulence pe traduzion di tescj in lenghe furlane ancje a ents publics e associazions.

Cun di plui, ancje midiant dal sît internet, comunicazions sui social e sui media, si intint ancje di:
- fâ cognossi, doprant la lenghe furlane, contignûts di informazion e di comunicazion dal Ateneu,
- promovi lis ativitâts didatichis, di ricercje e di divulgazion in cont de lenghe e de culture dal Friûl che a vegnin inmaneadis di bande dal CIRF,
- promovi la lenghe furlane tant che imprest di comunicazion e di creativitât moderni e normâl, segnalant ancje contignûts che si cjatin in rêt, fûr des pagjinis e dai sîts dal Ateneu,
- fâ cognossi lis tematichis leadis ae tutele des minorancis, ae promozion de diversitât linguistiche e culturâl e ae promozion de lenghe e de culture dal Friûl.

Il sportel pe lenghe furlane si cjatilu tai uficis dal CIRF, in Palaç Antonini (vie Tarcisio Petracco 6, Udin).
Par informazions si pues clamâ il numar 0432 556486 o pûr mandâ un messaç di pueste eletroniche a sportel.furlan(at)uniud.it.