“Snait. Ricercje e istruzion in Academie” al è il program televisîfche al conte cuntun stîl divulgatîf ce che si intint cuant che si fevele di ricercje intai diviers setôrs sientifics e umanistics de universitât. Il progjet al è stât ideât dal regjist Marco D'Agostini, docent dal ateneu furlan, adun cul Centri interdipartimentâl pal Svilup de lenghe e de culture dal Friûl (CIRF) de Universitât dal Friûl, e al è stât realizât cu la colaborazion de sede regjonâl de Rai dal Friûl-Vignesie Julie e de struture di Programazion SPI.

I documentaris, dîs in dut, a son stâts trasmetûts su la rêt regjonâl Rai FVJ (Rai 3bis, canâl 810) tacant dal mês di Mai dal 2022, e daspò a son stâts replicâts. Ducj i dîs documentaris si puedin cjalâ sul canâl Youtube Play Uniud de Universitât, intune playlist dedicade.

Si trate di documentaris e intervistis in lenghe furlane, fatis de condutore Serena Fogolini, su lis diviersis ativitâts dai dipartiments e su lis diviersis realtâts de Universitât di Udin: dai laboratoris e des ativitâts dal Dipartiment di Agrarie, ai studiôs intai cjamps de economie e de storie; des ricercjis informatichis e su la inteligjence artificiâl ae descrizion dal patrimoni preziôs des bibliotechis; des esperiencis tal cjamp linguistic ai esperiments tal cjamp psicologjic e de formazion.

Il progjet, par cure de Associazion Lenghis dal Drâc, al è stât realizât in gracie dal finanziament dal CIRF.