E torne la Dolomiti Mountain School, che ancje tal 2023 e propon une rassegne di apontaments tes localitâts des tieris altis, cun dibatits e lezions su lis Dolomitis Furlanis e la montagne in gjenerâl.

Si fevelarà di nature, culture, storie, economie, clime, ambient naturâl e antropic, turisim e dut ce che si pues cjapâ dentri te peraule “paisaç”, ven a stai l’ecuilibri dificil tra la azion de nature e chê dal om. La rassegne e je indreçade a aministradôrs, tecnics, professioniscj, operadôrs economics, sociâi e turistics atîfs tai teritoris declarâts Patrimoni Mondiâl de UNESCO, ma ancje ai citadins che a vivin ta chescj teritoris di mont.

La edizion 2023 e vignarà screade vinars ai 21 di Avrîl li dal Palaç Garzolini Di Toppo Wassermann de Universitât, in vie Glemone 92 a Udin, cui intervents di Roberto Pinton, Magnific Retôr de Universitât dal Friûl, Mara Nemela, diretore de Fondazion Dolomiti UNESCO, e Gianpaolo Carbonetto, gjornalist, studiôs di culturis de mont e coordenadôr de Scuele. Il condutôr dal event al sarà Pierpaolo Zanchetta dal Servizi Biodiversitât de Regjon Friûl – Vignesie Julie. Marco Aime, docent di antropologjie culturâl te Universitât di Gjenue, al tignarà une lectio magistralis sul teme Noi-ambiente: un’altra idea di natura.

Datis, lûcs e temis di chei incuintris in calendari, che a àn ducj l’orari 9.30 – 18.00, a saran chei ca: vinars ai 26 di Mai a Tumieç Sulle tracce montane dei nostri antenati, vinars ai 16 di Jugn a Soclêf Il clima cambia la natura delle terre alte, joibe ai 21 e vinars ai 22 di Setembar a For Disore Natura da recuperare e non più da forzare e vinars ai 10 di Novembar a Pontebe Nuove regole di comportamento nei tanti modi di andare in montagna.

L’event a jentrade libare al è organizât de Regjon Friûl – Vignesie Julie in colaborazion cu la Comunitât di mont de Cjargne e la ASCA, Associazion des Sezions CAI de Cjargne-Cjanâl dal Fier-Valcjanâl.

Par lei ducj i detais si pues viodi la gnove sul sît di Uniud.