Vinars ai 29 di Otubar a 8 e mieze di sere a Udin li de Aule 9 di Palaç Garzolini Di Toppo Wassermann (borc Glemone 92) e vignarà fate la presentazion di Rosa Cantoni "Giulia" Poesie, une racuelte di poesiis ineditis de innomenade partigjane furlane, protagoniste de Lote di Liberazion, che e à vivût la esperience dal internament tal cjamp di concentrament di Buchenwald e che fin ae sô muart, ai 28 di Zenâr dal 2009, e je lade dilunc a fâ memorie vive de Resistence.

A son previodûts i intervents di Livia Turco de Fondazion Nilde Iotti (in linie) e dal diretôr dal CIRF de Universitât dal Friûl, Enrico Peterlunger, cu la partecipazion di Antonella Lestani dal coordenament des feminis de Anpi di Udin, di Federica Vincenti, che e je stade daûr dal progjet editoriâl, de poete e tradutore Cristina Micelli, dal ilustradôr Luca Ruffino e dal grafic Matteo Molinaro.

L'incuintri, che al vignarà coordenât di Aurora Malta, al è inmaneât de Anpi di Udin cul patrocini de Universitât dal Friûl e la iniziative e je stade metude adun ancje cul jutori dal Comun di Udin, di COOP Alleanza 3.0 e de Regjon Autonome  Friûl-VJ.