Vinars ai 28 di Lui a 9 sot sere li de aziende agricule FERRIN VINI in localitât Casali Maione, 8 a Cjamin dal Tiliment
al sarà presentât il libri di Pre ANTONI BELINE dal titul Cirint lis olmis di Diu - 8
Sottitul: OLMIS INEDITIS - PREPARADIS E MAI PUBLICADIS
publicât par cure des Edizions Glesie Furlane
A presentin il prof. MATTEO VENIER e pre ROMANO MICHELOTTI
Leturis par cure dai "Viandants"

Ai 11 di Novembar dal 1993 su "La Vita Cattolica", il setemanâl de Diocesi di Udin, pe prime volte e compâr une gnove rubriche: "Cirint lis olmis di Diu".
L'autôr, pre Antoni Beline, setemane dopo setemene simpri plui preseât dai siei letôrs, al publicarà lis sôs "Olmis" fintremai la sô ultime dì.
Stant che Diu no si pues viodilu ma al lasse lis sôs olmis, i segnâi dal so passaç e de sô opare tal mont, pre Antoni al cîr chestis olmis movintsi libar, cence prejudizis e sburtât di passion pe veretât, pai trois dispès ingredeâts e malsigûrs che la storie nus presente. Une leture sapiente e sapienziâl, buine di cjalâ ancje là che nissun cjale. Cussì pre Antoni al scrîf te Jentrade dal prin volum dai siet
che a metin dongje dutis lis Olmis publicadis:

«O ai cirût no di dâ une rispueste al grant probleme dal vivi ma une clâf di leture, une indicazion per un troi che ognun al varà di bati cun umiltât, libertât e fadie par cjatâ la olme di Diu e il so passač mistereôs. [...] O dedichi chestis puaris pagjnis [...] a duc’ chei che no viodin Diu e no sintin nissune sô presince consolant. Ma a van indenant instes, spinansi e sanganansi tai baraz de vite, dal
moment che no si po' vivi cence fede. Fede come fuarce, come ricjerce, come istint di vite»

"Cirint lis olmis di Diu 8" al racuei chês Olmis che a jerin restadis platadis tal computer di pre Antoni e che, par resons che dome lui al sa, a son stadis tignudis di bande o no son stadis finidis. Chest nol vûl dî ch'a son mancul significativis o interessantis di chês za publicadis e ognidun, leintlis, al varà mût di sincirâsi.

Pre Antoni Beline (Pietrantonio Bellina) nassût a Vençon ai 11 di Fevrâr dal 1941 al è jentrât in seminari a 11 agns. Ordenât predi inte Metropolitane di Udin ai 29 di Jugn dal 1965, par trê agns al è stât a Codroip tant che cooperadôr capelan.

Ai 11 di Mai dal 1968 al e jentrât come plevan te plêf di San Martin di Rualp e Val e, dopo, in chê di San Zuan Batiste a Treli, paîs dal Canâl di Incjaroi in Cjargne. Chi al à madressudis lis sieltis ch'a àn orientade dute la sô vite. A la vore pastorâl e umane al à zontât chê di insegnant di religion te scuele superiôr e po di mesti di scuele elementâr. Par agns, in canoniche, al à puartât indenant une scuele privade pai fruts che no podevin lâ a lis scuelis mediis di Darte. Par une salût che par dute la vite lu à fat tribulâ, tal 1982 al à scugnût stralozâ a Visepente di Basilian, come mestri e plevan. Tal 1974 e je tacade la sô cariere di scritôr, giornalist e tradutôr. La bibliografie e passe i sessante titui, ma chê che lui al clame «la mê aventure plui lungje e fadiose là che o ai scuvierte la man di Diu che mi à compagnât» e je la traduzion par furlan da la Bibie, tacade cun pre Checo Placerean e puartade insom di bessôl. Al à vinçût dôs voltis il “Premi San Simon” di Codroip: tal 1991 cun “Pre Pitin” e tal 1999 cun “Trilogjie Tormentade”. Tal 2000 al à cjapât il premi Pefanie di Tarcint. Al è muart a Visepente ai 23 di Avrîl dal 2007.

Jentrade libare. I recapits par notâsi a son tal invît in zonte.