Un apontament interessant par ducj cuancj e un event di formazion e inzornament professionâl par chei che a son  notâts tal Ordin dai Gjornaliscj (OdG). Al è chel che al ven inmaneât pai 15 di Dicembar, di 10 a buinore a une dopomisdì, inte Sale Tomadini a Udin (Vie Tomadini 30, Universitât dal Friûl, Pôl Economic Juridic, plan tiere) dal CIRF e dal OdG dal Friûl-VJ.

Il titul dal incuintri – Lingue, minoranze, diritti, identità, autogoverno e informazione. Friuli, Europa –  al sclarìs cuâi che a son i argoments tratâts. E je une ocasion par cognossi alc di plui in cont di cuistions che a àn une rilevance particolâr des nestris bandis e là che al è normâl cjatâ riferiments e conessions jenfri Friûl e Europe.

E vignarà definide la suaze teoriche di riferiment cu la definizion di cualchi peraule clâf tant che minorance/minorancis, lenghis minoritariis o minorizadis, tutele e cun riferments sei ae normative che aes rivendicazions e aes iniziativis politichis e al contest dai media. Cun di plui a vignaran fatis ancje comparazions, su chescj cantins, jenfri diviersis realtâts di Europe: dal Friûl ae Sardegne, dal Paîs Basc ae Scozie, de Catalogne al Gales…

L'incuintri al vignarà condusût dal sociolic Adriano Cirulli, ricercjadôr dal Dipartiment di Siencis Matematichis, Informatichis e Fisichis de Universitât dal Friûl, là che al insegne Social Media e Comunicazion Visuâl, e dal gjornalist, storic e politolic Marco Stolfo, che al insegne Storie contemporanie e des comunicazions di masse intal Cors di lauree in Relazions Publichis li dal Centri Polifunzionâl di Gurize dal Ateneu furlan.

La partecipazion e je libare e sore nuie. Gjornaliscj publiciscj e professioniscj a àn di notâsi midiant dal sît de Formazion dal OdG.

Par vê altris informazions si pues scrivi o telefonâ al CIRF (cirf(at)uniud.it, sportel.furlan(at)uniud.it, 0432-556480).