Ancje pal 2023 il Centri interdipartimentâl pal svilup de lenghe e de culture dal Friûl (CIRF) de Universitât dal Friûl al torne a proponi i siei cors gratuits di lenghe furlane indreçâts ai dipendents de Aministrazion Publiche e inmaneâts in gracie dai fonts proviodûts de leç 482 dai 15 di Dicembar dal 1999, pe tutele des “minorancis linguistichis storichis”.

Pe session de Vierte a son in program doi cors, un di nivel di base, dai 12 di Avrîl ai 22 di Mai, e un di nivel intermedi o avanzât, dal 1n di Jugn ai 6 di Lui.
Ducj i doi i cors a son dividûts in 10 incuintris, che si davuelzaran su la plateforme informatiche Microsoft Teams, tai dopomisdîs di lunis e di miercus, cun orari 14.30-17.30 (cors nivel di base) e di martars e di joibe (cors nivel intermedi o avanzât) cun orari 14.30-17.30, par un totâl di 30 oris dal un.

Ae fin dal percors formatîf al è previodût un esam, di mût di stazâ lis competencis cjapadis sù. Ai corsiscj che a passaran la prove finâl e che a varan frecuentât almancul l’80% des oris ur vignarà dât un atestât di frecuence.
Vie pai agns, la iniziative si è dimostrade un strument zovevul par chei che a lavorin intun Ent Public dal teritori di lenghe furlane e che a àn voie di insiorâ lis lôr competencis e di miorâ tal stes timp ancje il contat cui utents. 
Cun di fat, i cors a vegnin inmaneâts cun chê di dâur lis competencis che a coventin par davuelzi il lôr lavôr inte maniere miôr, daûr des previsions in cont dai ûs publics des lenghis minorizadis che a son inte legjislazion statâl e regjonâl di tutele des minorancis linguistichis, che a metin in vore il principi di fonde che si cjate tal articul 6 de Costituzion de Republiche taliane.

Par vê altris informazions e par notâsi si pues contatâ la segretarie organizative dal CIRF al numar 0432 556480 o ben si pues mandâ un messaç di pueste eletroniche a cirf(at)uniud.it (segretarie dal CIRF) o  a sportel.furlan(at)uniud.it.