Ancje vie pe Vierte il Centri interdipartimentâl pal disvilup de lenghe e de culture dal Friûl (CIRF) de Universitât dal Friûl al inmanee gnûfs cors gratuits di lenghe furlane pai dipendents des aministrazions publichis,par che a puedin cjapâ sù lis competencis linguistichis che a coventin par fâ il ben lôr mistîr di “civil servants” in linie cun ce che a previodin l'articul 6 de Costituzion de Republiche Taliane e lis leçs di tutele, a nivel statâl e regjonâl.

La gnove ativitât formative, che e ven metude adun daûr de leç 482 dal 1999, e vignarà screade ai 28 di Març e e larà dilunc fintremai ai 15 di Jugn.
Il prin cors, di nivel di fonde, si davuelç dai 28 di Març ai 4 di Mai, il secont, di nivel intermedi, al scomence ai 16 di Mai e si siere ai 15 di Jugn.
Ducj i doi i cors a son dividûts in dîs  incuintris (il lunis e il miercus cun orari 15.00-18.00 par un totâl di trente oris par om) e si fasaran in linie su la plateforme informatiche Microsoft Teams.

I corsiscj che a passaran l'esam finâl e che a varan frecuentât almancul l'80% des oris a otignaran un atestât di frecuence cun merit. 

Par informazions e par notâsi al è pussibil contatâ la segretarie organizative dal CIRF al numar di telefon 0432 556480 o midiant la pueste eletroniche ae direzion cirf(at)uniud.it (segretarie dal CIRF) o sportel.furlan(at)uniud.it (Sportel pe Lenghe Furlane). 

Il modul di iscrizion si pues discjamâlu culì.