Qui tollis peccata mundi, il spetacul par vôs recitante, côr e ensemble orchestrâl scrit di Carlo Tolazzi e metût in musiche di Davide Pitis, al è lât in sene miercus ai 18 di Otubar dal 2023 tal teatri Palamostre di Udin.

Il spetacul al è struturât inte forme dal melolic e al è stât interpretât di Maurizio Fanin (vôs recitante), dal Ensemble de Filarmoniche dal Friûl Vignesie Julie e dal Ensemble dal Côr "G. Pressacco" de Universitât dal Friûl. La direzion e je stade di Davide Pitis che al è ancje autôr des musichis.

Il CIRF al à volût tornâ a puartâ in sene cheste opare che e jere stade rapresentade pe prime volte tal 2010 e no jere stade mai replicade. Il spetacul al propon une storie no vere ma plausibil, che e cjape ispirazion di une des corints eretichis che si jere difondude in Friûl tal secul XVI, la apocatastasi.

Secont cheste corint, che e nas dal pinsîr di Origene di Alessandrie, ae fin dai timps e sarà la redenzion universâl e dutis lis creaturis a saran reintegradis te plenece dal divin, comprendûts Satane e la muart: ta chest sens duncje, lis penis dal infier, ancje se lungjis, no son eternis ma a àn caratar di purificazion. I danâts a esistin, ma no par simpri, parcè che il dissen de salvece nol pues inverâsi se e mancje ancje une sole creature.

Cui che al conte la storie al è un frari che al incuintre doi personaçs feminîi: Virginia, une muinie, e Ottavia, une zovine, che in mûts diferents no vuelin conformâsi aes regulis e ae dutrine imponudis de Glesie dal timp.

Il spetacul culturâl (melolic) "Qui tollis peccata mundi" al è un progjet metût adun inte suaze des iniziativis su la lenghe furlane previodudis dal finanziament de Leç Regjonâl N. 2/2011.