La opare di Pasolini traviersade de "interogazion dal Sacri" e je stade il cûr de Cunvigne di Studis che il Centri Studis Pier Paolo Pasolini di Cjasarse, cu la poie de Regjon, Provincie e Comun di Pordenon e, cun di plui, cul patrocini morâl de Pro Civitate Christiana di Assisi e de Universitât dal Friûl, midiant dal CIRF, al à promovût e inmaneât tal Ridotto dal Teatri Pasolini tal mês di Novembar, in doi dîs cjamâts di relazions e di taulis di discussions articoladis.

Un teme di fonde e che al scjavace dute la leterature e il cine di Pasolini, che une schirie cetant numerose di studiôs di nomee e à previodût a resonâi parsore cuntune urdidure vierte a plui resonaments dissiplinârs: tocjant cjantins peâts nome ae antropologjie, cun Francesco Faeta, Laura Faranda, e Gian Paolo
Gri; cun visuâls dai rivocs umanistics e leteraris, cun Filippo La Porta e Nicola De
Cilia; dal pont di viste dal teatri, cun Paolo Puppa; cun viodudis cinematografichis e figurativis, cun pari Virgilio Fantuzzi, Tomaso Subini e Carla Sanguineti; cun sgjâfs di spessôr storic e religjôs, cun Remo Cacitti, Natale Spineto, Nicola Gasbarro e Pietro Lazagna. Ae derive cence padin dal "gjenocidi” culturâl di Soreli a mont, e massime talian, Pasolini i à metût cuintri la veretât de peraule-sunôr, phonè di poesie che e art al bios, e des musis dai puars, comparizions corporiis di paîs contadin, di borc e daspò tes sachis che e restin dal Tierç Mont. E la emozion e je stade inmò plui fuarte pe presince di Nico Naldini, che al à segnât la conclusion dai lavôrs cuntun intervent za dal titul sfulminant pe sô evocazion poetiche, Un filare di viti all'infinito. Ae fin de cunvigne, il pari gjesuit Virgilio Fantuzzi alà gjavât vie i vistîts di amì di Pasolini e di studiôs e al à tornât a meti sù chei di predi, par celebrâ insiemi ae Corâl di Cjasarse une messe tal “Glisiùt” di Sante Crôs, in ricuardi di Pier Paolo, de mari Susanna e dai lôr parincj.