Si è davuelte a Oradea, in Romanie, la prime Conference dal progjet UniNet, promovût de NPLD (la Rêt europeane pe promozion de diversitât linguistiche) e che al à tant che fin la cooperazion academiche sul pluralisim linguistic, l'insegnament des lenghis di minorance, i dirits linguistics, lis politichis di tutele e i studis di sociolinguistiche e linguistiche aplicade.

Al event a àn partecipât universitâts, istituzions teritoriâls e entitâts interessadis ae tutele des lenghis. In doi dîs a son stadis presentadis ativitâts e ricercjis disvilupadis in diviersis regjons tant che la Frisie, il Gales, il Paîs Basc, il Friûl, lis comunitâts ongjaresis in Romanie e chês finlandesis in Svezie. A son stadis elaboradis ideis progjetuâls e liniis vuide pe colaborazion tra universitâts, struturis universitariis e centris di ricercje, doprant programs tant che Erasmus+ e Horizon.

Il confront al à rivuardât scambis tra docents e students, ativitâts didatichis e di ricercje, disvilup di programs condividûts e promozion dai risultâts otignûts, cuntune atenzion particolâr ae identitât, al plurilinguisim, ai ûs linguistics in contescj formâi e informâi e al rapuart tra lenghis, identitât e tecnologjiis. Ae Conference a àn partecipât rapresentants galês (Coleg Cymraed Cenedlaethol e Universitât di Aberystwyth), frisons (Mercator Research Center e NHL Stenden) e bascs (Soziolinguistika Klusterra), e ancje esponents de Universitât di Stocolm, de universitât Locâl dal Partium, de Universitât dal Friûl e de Provincie de Frisie.

La ministre de Provincie de Frisie e Gábor Flore de Partium Keresztény Egyetem a àn firmât un protocol di intese par disvilupâ altris colaborazions tra i sogjets coinvolts in UniNet, cjapant dentri ancje chês altris universitâts che a operin in teritoris cun lenghis minoritariis. Si previodin acuardis interistituzionâi, scambis di docents e ricercjadôrs e propuestis progjetuâls par finanziaments de Union europeane.