In ocasion dai vincj agns de muart di pre Gilberto Pressacco, il Centri Interdipartimentâl pal svilup de lenghe e de culture dal Friûl – CIRF – de Universitât dal Friûl al inmanee un incuintri par ricuardâ l’om di culture e mestri che, cui siei studis cetant versatii (tant che chei su lis lidrîs dal Cristianisim a Aquilee, o su lis tradizions ebraichis passadis tal teritori dal Friûl) e cu la passion pe sô tiere, al insiorà e onorà il Friûl.

Vinars ai 15 di Setembar, cun di fat, aes 11 di matine, te aule T4 di Palaç Garzolini – di Toppo Wassermann de Universitât dal Friûl, e je in program la cerimonie “Gilberto Pressacco: jenfri storie de musiche e cjant corâl”, in colaborazion cu la associazion Don Gilberto Pressacco e cul contribût de Fondazion Friuli.

Daspò dal salût des autoritâts, il côr dal Ateneu furlan al sarà intitulât a chest musicist e storic che par prin al puartà il propri côr “G. B. Candotti” a cjantâ pe inaugurazion dal an academic a Udin tai agns Otante dal secul passât.

Il Diretôr dal CIRF, professôr Enrico Peterlunger, al leiarà lis motivazions dal non gnûf de cjantorie de Universitât dal Friûl, po dopo il côr dal Ateneu, adun cu la Schola Aquileiensis, si esibirà cun cjants di repertori. Un brindis al sierarà la cerimonie. Plui detais si cjatin tal leam achì sot.