Lis gnovis dal Cirf
Fieste de Patrie dal Friûl dal 2018
Ancje in Universitât e svole la acuile dal Friûl, ai 9 di Avrîl dal 2018, te sale dal Consei di Palaç Garzolini – di Toppo Wassermann, l’Ateneu furlan al à ricuardât la Fieste de Patrie dal Friûl.
A 4 e mieze dopomisdì, cun di fat, a son stâts presentâts i ats de cunvigne “La universalitât tal pinsîr di pre Antoni Beline”, che si jere tignude ai 2 di Otubar dal 2017, cu la poie de Fondazion Friuli e in colaborazion cun Glesie Furlane, Grop amîs di pre Toni e Istitût Ladin Furlan “Pre Checo Placerean”.
La publicazion, stampade cul contribût de Fondazion Friuli, e jes come sest numar de golaine dai “Cuaders dal CIRF” (edizion Forum) e e cjape dentri i intervents di bonsignôr Roberto Bertossi, Angelo Floramo e Gottardo Mitri. Lis relazions a son par talian e par furlan e a son stadis voltadis dal sportel pe lenghe furlane de Universitât.
Pe ocasion, te lezion vierte “Cuatri ideis par savoltâ la fabriche dai students: identitât, lenghe, paisaç e fantasie te utopie concrete di pre Antoni Beline”, il professôr Angelo Floramo al à scandaiât il teme de educazion scolastiche e dal leam cul contest locâl, cjapant ispirazion propite dai insegnaments dal autôr di La fabriche dai predis, che par agns si batè par difindi la identitât furlane.
