Lis gnovis dal Cirf

Al tache ae fin di Avost il gnûf cors di lenghe e culture furlane par zovins

Events e iniziativis

Dai 30 di Avost fintremai il 20 di Setembar, 20 oris cun lezions in presince ma ancje in linie

Slargjâ la ufierte formative pai students, vierzint di plui la proprie puarte di cjase. Cheste la propueste dal Centri Interdipartimentâl pal svilup de lenghe e de culture dal Friûl (CIRF), che al inmanee un cors di lenghe e culture furlane pai students dal Ateneu e par ducj i zovins interessâts a cognossi miôr la ricjece de nestre tiere, sedi a nivel linguistic, sedi par chel che al inten la storie, lis tradizions e il teritori.

La prime lezion si fasarà ai 30 di Avost dal 2021 e si larà indenant ducj i lunis e miercus, des 3 e mieze aes 6 e mieze daspò misdì, fin ai 20 di Setembar, par un totâl di 20 oris (i prins 6 incuintris a saran di 3 oris, intant che la ultime lezion, chê dal esam finâl, e sarà di 2 oris). Il cors si tignarà in presince, inte Sale Gusmani di Palaç Antonini (vie Petracco 8, Udin), ma ancje in linie, su plateforme informatiche Microsoft Teams, daûr de volontât dai students.

Il program al previôt elements di fonde di grafie e di gramatiche furlane, adun cun nozions di culture e di storie dal Friûl. Cun di plui, vie pes lezions a vignaran presentâts ancje i ents principâi pe promozion de lenghe e de culture furlanis, ven a stâi la Agjenzie Regjonâl pe Lenghe Furlane (ARLeF), la Societât Filologjiche Furlane e la Cooperative Informazione Friulana/Radio Onde Furlane, che a colaborin ae iniziative.
A ducj i iscrits ur vignarà dât un atestât di partecipazion. Pai fantats des superiôrs e je la pussibilitât di vê il ricognossiment dai credits formatîfs pe ativitât extrascolastiche. 

Par notâsi al cors al baste jemplâ il modul (a disposizion li di cheste direzion web) e mandâlu a sportel.furlan(at)uniud.it.

Par vê plui informazions si pues clamâ il CIRF al numar 0432 556480 o ben mandâ un messaç di pueste eletroniche a sportel.furlan(at)uniud.it o ancjemò visitâ la pagjine Facebook "Uniud par Furlan".

In zonte il comunicât e il volantin cun dutis lis informazions.

Indaûr