Lis gnovis dal Sportel

Suns Friûl, apontament ai 24 di Lui cu la vetrine dedicade aes gnovis produzions musicâls furlanis

Events e iniziativis

Une serade sot dal segn des sonoritâts plui modernis, dal dut in lenghe furlane

Suns Friûl e torne ancje chest an cu la sô propueste svariade di gjenars musicâi ducj par furlan. Sabide ai 24 di Lui, aes 9 sot sere inte suaze di Place Venerio a sunaran Cristian Mauro, bon di fondi la musiche di autôr americane cun chê furlane, i Trabeat cul lôr rock onest e sclet, ma ancje ii Vididule Project, grup leât massime ae forme dal teatri cjançon e che tal so repertori al misclice cun mistîr gjenars diferents tant che il folk, il rock, il pop e il blues. Cun lôr, ancje Nicole Coceancig, une des vôs plui zovinis, espressivis e ispiradis dai ultins agns.  

Ospits speciâi de serade a saran i Ezpalak, un dai grups plui potents e vivarôs framieç de za grintose sene musicâl basche. La band e tacarà a sunâ za vinars ai 23 di Lui aes 9 sot sere li de Cantine Produtôrs di Cormons, intun conciert che al cjape dentri ancje la esibizion dal Orko Trio, grup di trê jazziscj bisiacs cuntune anime punk, cul mestri dal blues poetic dai Cuei Orientâi, Fabian Riz.

La jentrade ai doi events e je libare ma al covente notâsi: pal conciert dai 23 di Lui (Ezpalak, Orko Trio e Fabian Riz) li di cheste direzion web e par chel dai 24 (Suns Friûl) li di cheste altre.

Indaûr