Dopo de esperience positive dal 2020, ancje chest an Suns Europe si davuelzarà vie pal Istât. Il festival de arts in lenghe minorizade al è inmaneât de cooperative Informazione Friulana, editore di Radio Onde Furlane, cu la poie economiche de Regjon Autonome Friûl-Vignesie Julie, de ARLeF - Agjenzie Regjonâl pe Lenghe Furlane e de Fondazion Friuli, e cu la colaborazion dal Comun di Udin, dal Istitût Basc Etxepare e di diviersis realtâts publichis e privadis, locâls e internazionâls e si davuelzarà a scjavaç tra i mês di Lui e di Avost.

I organizadôrs a son daûr a prontâ dut il program. Tra lis primis novitâts di segnalâ al è il lanç dal bant gnûf pe sezion musicâl. Inte edizion stade, di fat, par vie de situazion ingredeade causade de pandemie, i organizadôrs a vevin decidût di lassâ di bande la competizion e di invidâ une serie di grups e musiciscj “dongje” di  Suns Europe. Chest an, invezit, si torne inviâ la ricercje e la selezion di formazions e musiciscj che la lôr produzion e je espression di une des comunitâts linguistichis minorizadis de Europe midiant di un bant di pueste.

Lis candidaturis a varan di jessi presentadis dentri dai 6 di Jugn dal 2021 compilant il modul di pueste che si cjate li de direzion https://www.sunseurope.com/fur/bant-pe-sezion-musical-2021. A vignaran ametudis  dome composizions origjinâls e atentis ae inovazion, che la lôr valutazion e sarà dut intes mans dal comitât artistic di  Suns Europe. I finaliscj selezionâts a saran invidâts in Friûl par sunâ dal vîf a Udin intant de serade principâl dal festival o – e cheste e je une altre novitât – intun dai concierts che si fasaran ator pal Friûl.

Dutis lis informazions si lis cjate su www.sunseurope.com, su la pagjine Facebook ‘SUNS Europe’ e sul profîl Instagram “sunsfestival” o, par cualsisei dibisugne, scrivint a: info@sunseurope.com.