Suns Europe al torne ancje chest an e al cîr volontaris pe gnove edizion. Il festival european des arts intes lenghis minorizadis - inmaneât de cooperative Informazione Friulana, editore di Radio Onde Furlane, cu la poie economiche de Regjon Autonome Friûl –Vignesie Julie, de ARLeF - Agjenzie Regjonâl pe Lenghe Furlane, dal Comun di Udin e de Fondazion Friuli, e intune cul Istitût Basc Etxepare e cun altris realtâts publichis e privadis, locâls e internazionâls - al ufris une oportunitât uniche par jentrâ intal "mont" dal talent, dal plurilinguisim linguistic e de creativitât.

I volontaris a varan la incarghe di dâi il bon acet ai artiscj e di compagnâju in albierc e tai lûcs là che si davuelzaran lis ativitâts previodudis inte suaze dal Festival (in program tra la seconde metât di Lui e la prime setemane di Avost). Cun di plui a varan di viodi dai ponts informatîfs che a saran metûts sù tai diviers lûcs di Suns Europe (a Udin e inaltrò ator pal Friûl) e dâ une man pe logjistiche e pe tecniche.

Par candidâsi al bastarà vê finît 18 agns e jemplâ il modul di pueste che si cjate tal sît de manifestazion (https://www.sunseurope.com/fur/volontaris/) dentri dai 30 di Jugn dal 2021.

Par vê plui informazions si pues scrivi a volontari(at)sunseurope.com o pûr consultâ la direzion www.sunseurope.com o ancjemò dâ un cuc ae pagjine Facebook SUNS Europe o al profîl Instagram sunsfestival.