Il program di Suns Europe, il festival european des arts intes lenghis minorizadis, si scree ai 20 di Lui cu la presentazion dal documentari dal regjist Stefano Giacomuzzi dal titul Pozzis – Samarcanda.

Il cine al conte la storie di doi amîs avonde improbabii, un vecjo motociclist e un zovin regjist, che il lôr obietîf in comun al è chel di rivâ a Samarqand, intal Uzbekistan.

Un viaç epic e aventurôs fat di emozions, di dubis, di pôris ma ancje di cetante ricjece e diversitât linguistiche e culturâl che i doi si cjataran a vivi e frontâ vie pai 7000 e passe chilometris che a dividin il borc furlan di Pocis de lontane e esotiche Samarqand.

Za uns pôcs di dîs no son plui biliets pe proiezion di martars, ma Pozzis – Samarcanda al jentre inte programazion dal Visionario, tacant dai 21 di Lui.

La sezion di Suns Europe dedicade ae cinematografie e va dilunc la setemane che e ven cun altris doi titui di gale, Bogre di Fredo Valla miercus ai 28 di Lui e il film basc Ane di David Pérez Sañudo, proietât pe prime volte in assolût tal Stât talian joibe ai 29.