I imbrois fats a dam dai anzians a causin dispès alerte sociâl, cun carateristichis simpri diferentis, che a tocjin lis personis, in particolâr chês bessolis, sedi in cjase che in ambients publics. La prevenzion, duncje, e je impuartante par che i anzians a imparin a ricognossi il pericul e a savedin cemût compuartâsi par no jessi imbroiâts.

Cun chest obietîf, la Cuesture di Udin e à ideât e realizât, in colaborazion cu la ARLeF, une specifiche campagne di prevenzion e di sensibilizazion dai citadins. Si trate di cuatri spot video dulà che cu la colaborazion dal CSS Teatri Stabil di Inovazion dal Friûl-Vignesie Julie di Udin, si frontin lis situazions di imbroi e insidie plui comunis: al bancomat, a cjase, al telefon, par email. I protagoniscj a son innomenâts atôrs furlans: Caterina Tomasulo, ven a stâi Catine, e Fabiano Fantini, Claudio Moretti, Elvio Scruzzi dal Teatro Incerto.

Si trate di une iniziative cuntun fuart valôr sociâl, a pro de sigurece dai citadins, che e vâl par dutis lis fassis di etât, parcè che e met la atenzion su moments di vite che a tocjin ducj.

I videos de campagne si puedin viodi li di cheste direzion web.