Ancje la seconde edizion in rêt dai cors pratics di lenghe furlane, inmaneâts de Societât Filologjiche e sostignûts de ARLeF, e à regjistrât il dut esaurît, cun centevincj personis che si son notadis daspò des nonante de prime edizion tal mês di Fevrâr stât.

La emergjence Covid-19 di fat e à modificât in maniere radicâl tantis usancis, comprendudis chês dal insegnament e dal aprendiment, ma chest cambiament sfuarçât a pro de formazion a distance al à permetût in chest câs di rivâ a coinvolzi furlans e apassionâts in ogni dontri. Cussì a son rivadis ancje iscrizions dal forest, dal rest de Europe aes Americhis.

Potence de rêt duncje, tant che imprest che si podarà integrâ ancje cu lis modalitâts di insegnament plui tradizionâls intal avignî, ma ancje potence de lenghe furlane che e va dilunc a produsi interès in Friûl e ator pal mont.

I cors pratics di lenghe furlane, che si son davuelts e si davuelzaran dal dut in rêt, midiant des plateformis Moodle e Zoom, a son stâts metûts adun par incressi lis cognossincis dai iscrits che se a frecuentaran almancul il 70% des lezions a ricevaran un atestât di partecipazion: un titul culturâl par jentrâ te liste regjonâl dai insegnants cun competencis in lenghe furlane.