Il teme di chest an al è Il cjistiel dai confins incrosâts e al è ispirât a Italo Calvino. Si preparin trê zornadis sioris di events, cun tantis anticipazions tai dîs prime, pe decime edizion de Gnot dai Letôrs, organizade par cure dal Comun di Udin e des librariis de citât.

O segnalìn in particolâr un pôcs di events peâts ae culture furlane.

Cul futûr sot da lis ceis

Presentazion e proiezion de inchieste video Cul futûr sot da lis ceis.
Intervistis par cure di Angelo Floramo e Martina Delpiccolo, regjie di Paolo Comuzzi, coordenament di Federico Rossi. Progjet Colonos.
Tal spirt di Pasolini e dai siei “Comizis di amôr”, i Colonos a àn pensât di dâur vôs a chês fantatis e a chei fantats che la societât dai grancj no scolte plui.
Ce rispuindaressino vuê i zovins aes domandis dal poete di Cjasarse sul amôr, la sessualitât, la societât, la lenghe, la identitât, i confins, i prejudizis? Cemût saressino tal 2023 i siei “Comizis di amôr”?

• aes 19:00 la prime part (durade 1h 7min)
• aes 20:30 la seconde part (durade 1h 30min)

Martars ai 6 di Jugn des 7 di sere – Cine Visionari

Mataran Confidential

Segrets, fatarei, veretâts (e ridadis): la aventure de riviste satiriche regjonâl che dute la Italie nus invidie.
Cun David Benvenuto e Marco Tonus, redatôrs di Mataran.

Vinars ai 9 di Jugn aes 18:00 – Librarie Feltrinelli

Rime cantate. “Rimis cjantadis in onôr dal Colorêt”

Lis poesiis dal Sîscent di Ermes di Colorêt metudis in musiche di Lino Straulino e sunadis dal Ermes Music Consort.
Conciert di Lino Straulino (vôs e ghitare) cun Lisa Spizzamiglio (violoncel), Alessandra Cella (violin) e Serena Gani (oboe)

Vinars ai 9 di Jugn aes 21:00 – Loze dal Lionel

La poesie no duar – La poesia non dorme

Maratone di leture di poetis e poesiis de regjon

I poetis e lis poetis a learan i lôr viers o a saran lets di atôrs e atoris. In colaborazion cul Teatri Stabil Furlan.
Cun Chiara Carminati, Ivan Crico, Marta Riservato, Angelo Battel, Marina Giovannelli, Giacomo Vit, Antonella Sbuelz, Stefano Rizzardi, Francesca Cerno, Claudio De Maglio, Cristina Micelli, Manuel Buttus, Stjefin Morat, Carlo Selan, Martina Delpiccolo, Andrea Collavino, Stefano Rizzardi, Enzo Martines, Rita Maffei, Francesco Tomada, Aida Talliente, Andrea Appi, Carlotta Del Bianco, Maurizio Mattiuzza, Elvio Scruzzi, Fabiano Fantini, Claudio Moretti, Massimo Somaglino.

Vinars ai 9 di Jugn des 22:30 aes ore 2:30 – Cort Morpurgo

33/16, une aventure filmiche (e furlane) a 360°

Finanziade de ARLEF e dal Fonts Audiovisîf F-VJ, 33/16 e je la prime serie web par furlan fate dute cun telecjamaris a 360°. Midiant di 10 postazions cun visôrs pe realtât virtuâl, o sarês scaraventâts intun Friûl misteriôs e fantasientific dal 1969. Une imersion sensoriâl, percetive e emozionâl di no pierdi.

Sabide ai 10 di Jugn, des 10:00 aes 20:00 – Loze dal Lionel

De tiere indentri ae frontiere partint dai libris di Pietro Spirito

Des “Indemoniate di Verzegnis” (la gnove edizion e je de Biblioteca dell’Immagine), un piçul paîs de mont furlane dulà che tal 1878 si son manifestâts segnâi nefascj e fats sorenaturâi, ae frontiere cun “Gente di Trieste” (Laterza Editore), int di origjins, etis, culturis e lenghis diferentis, di ideis e pinsîrs comuns o contraris. Int che e à segnât une ete, o pûr che chê ete le à mancjade. Int che e je lade daûr a orizonts lontans e impussibii, a siums e progjets scoreâts dal aiar di buere.
E dialoghe cul autôr Cristina Benussi.

Sabide ai 10 di Jugn aes 11:00 – Loze dal Lionel

Marcondirondero: storiis di cjistiei, confins, segretis e cantinis.

Cun Angelo Floramo, storic de Ete di Mieç, docent e scritôr, consulent sientific pe Sezion antighe, manoscrits e libris rârs de Biblioteche Vuarneriane.
Inteletuâl bon di traviersâ cun sens critic e libar il nestri timp, il so ultin libri al è “Vino e libertà” (Bottega Errante Edizioni).
E dialoghe cun lui Martina Delpiccolo.

Sabide ai 10 di Jugn aes 21:00 – Loze dal Lionel