A Gurize e je di gnûf ore di “Contemporanea”. Une schirie di seminaris di aprofondiment peâts ai insegnaments di Storie contemporanie e des Comunicazions di masse e di Culturis politichis in Europe dal Cors di lauree in Relazions Publichis de Universitât dal Friûl, che si tegnin tal cjâf lûc dal Friûl Orientâl, inviade tal an 2021/2022 e disvilupade vie pal prin semestri di chest an academic, e che e va indevant ancje tal secont semestri.

Il prin apontament al è fissât par martars ai 23 di Mai aes 3, te Aula magna dal Pôl Santa Chiara (vie Santa Chiara 1, Gurize): Adriano Cirulli, ricercjadôr di Sociologjie dai procès culturâi e comunicatîfs dal DMIF dal Ateneu furlan, al condusarà un incuintri dal titul Unitât te diversitât. Identitât, culture, politiche e autoguvier in Europe, incentrât sui contignûts dai siei doi libris Etnoregionalismi. Teorie e problemi e L'ascia e il serpente, il prin dedicât ae realtât complesse dai nazionalisims periferics e des relativis istanzis autonomistis e indipendentistis in Europe, tra Nûfcent e agns Doimil, e il secont che al trate plui in detai la question basche.

Il secont incuintri, che al sarà te stesse sede miercus ai 24 di Mai aes 2, si intitule Comunicâ la storie. Lis ‘Lotis dal Cormôr’ tra web, radio e audiovisîf: Lorenzo Fabbro, Pauli Cantarut e Caterina Vignaduzzo a presentaran lis diviersis iniziativis di documentazion e divulgazion fatis tal 2020 pal setantesim aniversari des Lotis dal Cormôr, un dai fats plui impuartants e particolârs de storie dal Friûl tal secul XX.

Lis ativitâts di “Contemporanea” a son indreçadis prin di dut ai students di Relazions Publichis, tacant di chei che a àn di fâ i esams di Storie contemporanie e des Comunicazions di masse e di Culturis politichis in Europe, dut câs a puedin partecipâ ancje personis esternis.

Chescj doi gnûfs apontaments de serie “Contemporanea” a son stâts realizâts cul coordenament di Marco Stolfo, che al insegne Storie contemporanie e des Comunicazions di masse a Gurize e al è ricercjadôr di Storie des relazions internazionâls te Universitât di Turin, e cu la poie finanziarie de Fondazion CARIGO.