La campagne "Furlan = mieç di comunicazion al cuadrât" e vûl valorizâ l’ûs dal furlan, no dome inte sfere cuotidiane e intal cjamp leterari e artistic dulà che e à za lidrîs saldis, ma ancje tal univiers de sience, de tecnologjie e de cognossince.

Di fat, il furlan al à cognossût di resint un procès di insiorament e di evoluzion, testemoneât ancje de publicazion di une riviste di ricercje sientifiche e di cetancj dizionaris tecnics – cul contribût dal CIRF e de Universitât dal Friûl – che lu fasin deventâ un imprest di comunicazion atuâl e complet: de matematiche, ae inzegnerie, ae informatiche… La formule F= MC², derivade di chê E= MC², sinonim universâl di scuvierte sientifiche, e rimarche l’aspiet fuartementri inovatîf, cuasi "rivoluzionari", dal ûs dal furlan tant che lengaç sientific, tecnologjic e filosofic.

Dut chest intune campagne "di masse" che e à come protagoniscj temis che par solit si stimin tant che "academics": ae radio, al cine o par mieç di manifescj intai spazis coletîfs… une altre "sfide inte sfide" dal pont di viste de  comunicazion.