Cuatri apontaments cun “Bota e Rispuesta. Cjant par un poete contadin”, de Cjargne ae Basse e fintremai al Friûl di Mieç.Di Joibe ai 11 di Novembar a domenie ai 14 si podarà gjoldi dal spetacul dedicât ae poesie popolâr di Jacum Bisot par cuatri seradis, li dal Crai di Tausie, tes salis parochiâls di Muçane e Lavarian e li de Cjase de Musiche di Puçui, simpri a nûf mancul un cuart di sere, cun jentrade sore nuie e cu la necessitât di vê la certificazion verde.

Jacum Bisot (pe anagrafe Jacum Confin) cui siei viers gustôs e pevarins al è stât par tancj agns, dilunc vie de prime metât dal secul stât, animadôr di tantis edizions de classiche “Mascarada” di Orsarie di Premariâs.

La vitalitât e la umanitât de sôs poesiis a son stadis tornadis a cjapâ sù dal atôr e regjist Federico Scridel e dal compositôr, rangjadôr e polistrumentist Leo Virgjili, cu la colaborazion de cjantante Nicole Coceancig, di Mirco Tondon al liron e di Jacum Jack Iacuzzo aes percussions, che a metin adun un spetacul pardabon interessant.