Tra i mês di Mai e di Avost dal 1981 dîs fantats irlandês a pierderin la vite inte preson di Long Kesh, pôc fûr di Belfast, intun siopar de fam inviât par domandâ che ur vignìs ricognossût il status di presonîrs politics. Tra di lôr al jere ancje Bobby Sands, ricuardât inmò in dì di vuê ator pal mont tant che simbul de lote pe libertât e de resistence dai popui cuintri de opression nazionâl e sociâl.
A son passâts cuarante agns di in chê volte e in ocasion di chest inovâl “taront” Radio Onde Furlane e ricuarde chei fats cuntune serie di trasmissions di pueste dal titul Al jevâsi de lune.

La prime part dal progjet, screade ai 28 di Fevrâr cuntun speciâl che al contave lis lidrîs e il davuelzisi di chê vicende, e je lade indenant dal prin ai 17 di Març cu la leture des pagjinis dal diari che Bobby Sands al scrivè di scuindon intant des primis disesiet zornadis dal siopar de fam.

La seconde si invie vuê, ai 5 di Mai, juste cuarante agns dopo de muart di Bobby Sands, cuntune trasmission dedicade ae sô persone, a ce che al pensave e a ce che al faseve, e e larà dilunc fintremai tal mês di Avost. 

Il program dai apontaments radiofonics si disviluparà tignint cont dal aniversari cuarantesim de muart di ognidun di lôr: si fevelarà di Francis Hughes inte zornade di miercus ai 12 di Mai, di Raymond McCreesh e di Patsy O' Hara il vinars ai 21, di Joe McDonnell joibe ai 8 di Lui, di Martin Hurson martars ai 13, di Kevin Lynch domenie al 1° Avost, di Kieran Doherty lunis ai 2, di Thomas McElwee domenie ai 8 e, infin, di Micky Devine vinars ai 20. 
Ogni pontade e vignarà metude sù trê voltis te stesse zornade (h. 8.15; h. 14.40; h. 18.10). Al è diferent l'orari di chês de domenie: a 8, a une e mieze dopo misdì e a cinc e mieze sot sere.