La A.S.F. ASSOCIAZION SPORTIVE FURLANE, e je nassude cualchi mês indaûr cul obietîf di partecipâ e organizâ manifestazions sportivis, cul fin di clamâ dongje i furlans a manifestâ la lôr identitât di popul e linguistiche, e tal stes timp di promovi il nestri teritori a nivel culturâl e turistic. E organize par sabide ai 24 di Jugn aes 20,45 a Tresesin la prime partide de selezion furlane di bale tal zei.

La partide si fasarà tal playground di place Libertât, dulà che i furlans a frontaran il Jadran di Opicina, rapresentative dai slovens di Italie; cheste scuadre e milite te serie C gold cun risultâts une vore bogns.

L'esordi assolût par une formazion sportive furlane al vierzarà il XIII torneu BALE TAL ZEI, che si davuelzarà te setemane dopo.

La serade sportive e sarà ancjemò plui interessante in gracie dal dibatit in program aes 19.30 sul cantin La impuartance dal sport tes comunitâts di lenghe o popul di minorance.

Si confrontaran il mitic comentadôr sportîf e gjornalist Sergio Tavcar, autôr dal libri L’uomo raccontava il basket e il manager e sportîf Marino Firmani, autôr adun cul prof. Flavio Pressacco, cun Roberto Ponticello e Renato Collini dal libri Un secolo a canestro – Friuli-Venezia Giulia tra storie e sport; a saran moderâts dal gjornalist e insegnant Walter Tomada, autôr dal libri Storia del Friuli e dei Friulani.

La jentrade ai events e je sore nuie, e chescj si fasaran ancje tal câs di brut timp, inte palestre comunâl li dongje.

I chioscs a saran vierts al public des 19.00; al sarà impuartant rivâ adore par assisti al “pre-partide” e ancje parcè che ai prins 100  spetatôrs e sarà regalade la bandiere dal Friûl (ufierte dal ISTITÛT LADIN FURLAN).

Ducj a son invidâts, sportîfs e no, par passâ une serade tra sport, culture e identitât.

L’event al è organizât ancje cul patrocini dal Comun di Tresesin e dal ENTE FRIULI NEL MONDO e al sarà trasmetût ancje intune direte Facebook.

A.S.F. ASSOCIAZION SPORTIVE FURLANE

Plaçâl Valle del But, 8 - 33100 UDIN