Lis gnovis dal Sportel

A Suns Europe doi incuintris leteraris sui mestris ocitans di Dante e su lis feminis che a àn fat sù il Paîs Basc

Events e iniziativis

La serade dai 27 di Lui e je sot dal segn de leterature cun Cira Crespo, Angelo Floramo e Andrea Giraudo

La propueste culturâl di Suns Europe si insiore di doi events che nus judin a cognossi la storie basche di une prospetive divierse e a discuvierzi il leam jenfri Dante Alighieri e i poetis ocitans.

Tal prin, in program martars ai 27 di Lui aes 6 sot sere te Librarie Tarantola di Udin, la scritore Cira Crespo e fevelarà adun cun Carli Pup, moderadôr, dal so libri dal titul «Baginen. Euskal Herriko Historia Emakumeen Bitzartez». La opare, votade de Associazion des librariis de Navare tant che il miôr libri par basc jessût intal 2020, e conte lis vicendis di passe cincuante feminis che fin cumò a vevin vude pocje o nissune visibilitât e che a scjavaç tra secui e cundizions sociâls diferentis a son stadis protagonistis de storie dal Paîs Basc.

Simpri ai 27 di Lui, ma aes 9 sot sere te Place dal Comun di Murùs, si davuelzarà il secont incuintri in program, un dialic jenfri il furlan Angelo Floramo e l’ocitan Andrea Giraudo che nus acompagnaran intun viaç te storie e tal las de lenghe ocitane. A cjaval tra i secui XII e XIII, in fat, e fo la lenghe di riferiment de leterature europeane e cui siei mestris e rivà a slargjâ ator pal Vecjo Continent ideis e visions gnovis e, par diviers aspiets, rivoluzionariis, tant che fintremai Dante i à rindût omaç e le à doprade in cualchi viers de Divine Comedie.

La jentrade ai doi events e je libare ma al covente notâsi: pal prin incuintri li di cheste direzion web e pal secont li di cheste altre.

Indaûr