Dai 13 ai 16 di Lui la Universitât dal Friûl e inmanee une iniziative dal titul “Università ti incontra” cun chê di meti a disposizion dai futûrs students un servizi di supuart, a distance e in presince, par judâju a notâsi aes provis e par completâ la procedure di imatricolazion ai cors di lauree.

Tutors e orientadôrs a saran a disposizion par colocuis personalizâts e par presentâ i servizis ufierts ai students de bande de Universitât dal Friûl e de Agjenzie regjonâl pal dirit al studi. Cun di plui, par cui che al vignarà di persone, al sarà pussibil visitâ la sede dai diferents cors.

Ogni zornade e sarà dedicade a un percors formatîf diferent: il program si scree martars ai 13 di Lui cu la presentazion dal pôl umanistic a palaç Antonini, miercus ai 14 al tocjarà a chel economic-juridic in vie Tomadini là che ai 15 e sarà la volte dai cors che si tegnin a Gurize (Relazions publichis e Dams) e Pordenon (Bancje e Finance, Infermieristiche, Siencis e tecnologjiis multimediâls). A sierâ l’event vinars ai 16 di Lui e sarà la presentazion dal pôl sientific e medic in Via delle Scienze a Udin.

Al è obligatori notâsi al event e si lu pues fâ mediant di chest formulari.