A son cirche cuatrimil i students che si son notâts aes primis dôs zornadis dal Student Day de Universitât dal Friûl, ai 8 e 9 di Març, e a vegnin des scuelis di dut il Friûl-Vignesie Julie e dal Venit Orientâl. 

L’event di orientament plui impuartant targât Uniud al va indevant ancje vinars ai 15 e sabide ai 16 di Març te aree sientifiche dai Riçs.

Dopo des zornadis di Udin, il Student Day si spostarà ai 8 di Mai a Pordenon, ai 9 a Gurize e ai 10 a Glemone. Al è dedicât ai students dai ultins agns des scuelis superiôrs interessâts a cognossi miôr la Universitât dal Friûl par sielzi il cors di lauree dulà iscrivisi dopo de maturitât. Il Student Day al è stât screât in presince dal retôr e des autoritâts, rivant cussì al travuart de 29esime edizion e confermant il so sucès tra i zovins e i insegnants.

Chest an il Student Day al propon in dut 60 presentazions di cors di lauree, dongje di laboratoris e visitis vuidadis ai laboratoris dal Uniud Lab Village e dai dipartiments, siet anticips di provis par diviersis areis dissiplinârs, dôs simulazions di provis dai cors a acès programât e di valutazion des competencis iniziâls.

A son ancje incuintris e confronts cun tutors, docents e personâl specializât par aprofondî i servizis pai students, lis oportunitâts professionâls, la realtât de vite universitarie, lis ativitâts sportivis universitariis, ma ancje lis ocasions di divertiment e di impegn sociâl e culturâl organizadis des associazions dai students e des realtâts dal teritori.

Ancje il CIRF al è presint al Student Day par presentâ lis ativitâts peadis ae lenghe e culture furlane, prin di dut il cors pai students, che al è viert a ducj i zovins interessâts e si fasarà in linie tal mês di Setembar.

Par partecipâ al Student Day si à di notâsi aes zornadis singulis jemplant il modul in linie sul portâl dedicât. Cui che nol pues partecipâ in presince al pues sielzi lis ativitâts in linie.

Informazions e iscrizions te pagjine www.uniud.it/it/landing-astu/conosci-uniud