Dutis lis gnovis

Radio Onde Furlane e fâs il cambi di stagjon. Dai 26 di Setembar al torne il palinsest standard e a tachin programs gnûfs

Cu la fin dal Istât al mude ancje il palinsest di Radio Onde Furlane, che al lasse in bande la struture stagjonâl, cun cualchi program di mancul e cun oraris diferents, e al recupare chê standard, plui siore pai contignûts e pes oris di emission in direte. 

Ai 26 di Setembar al torne il palinsest in vore pe plui part da an. Lis trasmissions in direte a tachin a 8 a buinore cu la prime edizion dal Gjornâl Radio, intant che In dì di vuê, la rubriche dedicade ae rassegne de stampe dai media locâi e internazionâi e torne a 9 e po in repliche a misdì e mieç. Chei altris doi apontaments cuotidians cu la informazion locâl dal Gjornâl Radio a restin a misdì e dîs e a sîs sot sere.

Par ce che al tocje il rest de programazion de matine, di une bande al è il recupar de fasse tra lis 8 e mieze e lis 9 cu la programazion di rubrichis tematichis di caratar culturâl, artistic e sociâl e di chê altre e je la tornade in vore dal contignidôr Ator ator che al tache a 9.30. Intal spazi principâl dedicât a culture, societât e atualitât si confermin apontaments specifics tant che Schiribicilu, l'aprofondiment sportîf dal lunis, o Licôf, la rubriche setemanâl dedicade ai lengaçs e aes culturis digjitâls. A 11 a son confermadis dutis lis trasmissions tematichis, di Arti Elastiche dal lunis a La Crame de sabide.

Al reste un pont fer, in dutis lis stagjons, la rubriche Ce fâ?, che e va dilunc a  jessi presinte dôs voltis in dì, dal lunis ae sabide a 11 e mieze a matine e a 6 e mieze sot sere, cun dutis lis segnlazions che a coventin in cont di cines, teatris, concierts e plui in gjenerâl di ducj i avigniments e i apontaments culturâi che si davulezin in Friûl e dulintor.

Vie pai dopomisdîs e pes seradis e torne ancje la interie batarie di trasmissions musicâls e tematichis e in curt a tacaran ancje programs e formâts gnûfs.

Indaûr