Tal palisest di Radio Onde Furlane e je daûr a tacâ une gnove trasmission. Il so titul al è Marco e Adelina. Viaç inte salût mentâl in Friûl-VJ tal passât e tal presint e e je une serie radiofoniche di sîs pontadis, curade e cundusude di Margherita Cogoi e Marta Savorgnan e metude adun ancje cu la colaborazion dal coletîf I Magnifici, de cooperative sociâl Itaca Onlus e dal Heimat Museo de cooperative Varianti, 

Il percors fat indenant de trasmission al ten dongje esperiencis individuâls e coletivis, ricuardant ancje doi inovâi: chel de prime volte che, juste cincuante agns indaûr, Marco Cavallo – il Marco menzonât tal titul dal program – al vignive dal manicomi di Triest e chel dai cuarantecinc agns de aprovazion e de jentrade in vore di chê che e je cognossude cul non di Leç Basaglia, il proviodiment che al à permetût la sierade dai manicomis e il passaç de segregazion ae cure. 

Si fevelarà di salût mentâl cun plui ponts di viodude, in gracie dal contribût di educadôrs, psichiatris, infermîrs e operadôrs culturâi e des testemoneancis diretis di personis che a son in cure cul sisteme sanitari.
Tra i ospits a son ancje i psichiatris Mario Novello e Peppe Dell’Acqua, za colaboradôr di Franco Basaglia, che par disesiet agns al è stât diretôr dal Dipartiment di salût mentâl di Triest e po tra i
promotôrs dal Forum de salût mentâl. 

La serie si scree ai 25 di Fevrâr a dôs dopo di misdì e po in repliche a chê stesse ore il Prin di Març. Ducj apontaments a son in programazion la sabide e il miercus a dôs dopo di misdì sui 90 Mhz, sui 90.2 Mhz, sui 105.6 Mhz e in rêt ae direzion www.radioondefurlane.eu. Cun di plui dute la serie e sarà a disposizion in podcast sui canâi Spreaker, Deezer e Spotify di Onde Furlane.