E je partide la edizion numar 10 de Setemane de Culture Furlane, cuntun calendari di 200 events che si disvilupe dai 18 ai 28 di Mai, coordenade de Societât Filologjiche Furlane, che e à colaborât cun plui di 70 Comuns, 20 scuelis e istitûts comprensîfs, e 180 realtâts associativis dal teritori tant che centris e grups culturâi, museus e ecomuseus, parochiis, pro loco, côrs e compagniis teatrâls.

Lis manifestazions a includin cunvignis e conferencis, presentazions di libris, visitis vuidadis, leturis e laboratoris pai fruts, spetacui e concierts sparniçâts ta dut il teritori dal Friûl.

In particolâr al sarà ricuardât il compositôr Arturo Zardini a cent agns de sô muart (1869-1923) cun concierts e incuintris dedicâts a lui tal so paîs di nassite Pontebe, a Udin, Padier, Mueç e Pagnà.

Ancje la Universitât dal Friûl e partecipe cun doi apontaments dedicâts a Giuseppe Bugatto (joibe ai 18 di Mai cun Ferruccio Tassin e Marco Stolfo) e Achille Tellini (vinars ai 26 di Mai cun Donato Toffoli e Marco Stolfo). Ducj i doi i events a son a 5 dopomisdì te aule 2 di Palaç Antonini in vie Petracco 6 a Udin.

Domenie ai 28 di Mai la conclusion a Prepot cu la tradizionâl Fraie de Vierte, la fieste di primevere che chest an e propon ancje la novitât de Fraie dai Fruts, une zornade dedicade ai fruts de scuele de infanzie e primarie di Prepot.

La Setemane si sierarà a Udin tal Palaç Mantica sede de Filologjiche, a 8 e mieze di sere cu la anteprime dal reading Noterelle / Storiis di Graziadio Isaia Ascoli cul Teatro Incerto, su la vite e i studis dal linguist gurizan  autôr dai «Saggi Ladini» dal 1873, che i è intitulade la stesse Filologjiche.

Sul sît www.setemane.it si pues viodi il program zornade par zornade, la mape dai puescj e si pues cjalâ tancj events in direte streaming.

In zonte il librut di discjamâ cul program de Setemane.