Il progjet La Conferenza sul futuro dell'Europa. Un nuovo slancio per la democrazia europea, metût adun dal Centri di documentazion europeane 'G. Commessatti' dal nestri Ateneu, cu la colaborazion de cooperative Informazione Friulana e cul jutori de Rapresentance in Italie de Comission Europeane, si svicine ae sô conclusion.

Vie par cheste setemane e je in programazion la cuinte e ultime pontade de trasmission radiofoniche Europe in Divignî, cui intervents di Ivo del Negro de Cjase pe Europe di Glemone e eurodeputade Elena Lizzi, che in cualchi maniere la sô testemoneance e rapresente ancje chei altris parlamentârs europeans furlans (Marco Dreosto e Marco Zullo).

Ancje cheste pontade si pues scoltâle su lis frecuencis di Radio Onde Furlane (sui 90 Mhz, sui 90.2 Mhz e in streaming ae direzion www.radioondefurlane.eu). Cun di plui dopo de prime emission di lunis ai 28 di Jugn a 8.30 a buinore e torne in onde martars ai 29 a une mieze dopo di misdì,e miercus ai 30, a 5 e mieze sot sere. Cun di plui, compagn di chês altris, e sarà a disposizion in podcast.

La ultime pontade di Europe in Divignî e rive dopo dal tierç e ultin incuintri in rêt, fat joibe stade ai 24 di Jugn cun Ivo Del Negro de Cjase pe Europe di Glemone, cun Francesca Gravner de Academie Europeiste di Gurize, cun Laura Zuzzi dal IRSE, cun Nicolas Novel e Joshua Giovanni Honeycutt Balduzzi dal Moviment Federalist European (MFE) e cun Claudio Cressati e Daniela Cattalini dal Centri di documentazion europeane 'G. Commessatti' de Universitât dal Friûl.