La Universitât dal Friûl e scree la gnove lauree magjistrâl in Citadinance, istituzions e politichis europeanis dal Dipartiment di Siencis juridichis. La presentazion e sarà lunis ai 4 di Setembar a 11, te Sale Florio di Palaç Florio, in vie Palladio 8 a Udin.

Dopo dal salût dal proretôr Andrea Cafarelli e de introduzion de diretore dal Dipartiment Elena D’Orlando, Claudio Cressati al presentarà il gnûf cors di studi.

Jacques Ziller, za professôr di Dirit de Union Europeane tes Universitâts di Pavie e Parîs 1 Panthéon-Sorbonne, al tignarà une lectio magistralis dal titul “Comunitât politiche europeane, Consei di Europe e Union europeane: progjets diferents o dome formis diferentis?”.

A saran ancje i intervents musicâi dal duet Rita Maggio – Gabriele Pozzo Ensemble de Orchestre de Universitât dal Friûl.

Il percors bienâl si tignarà ancje par inglês e al formarà professioniscj cun cognossince des dissiplinis juridichis, economichis, politichis, sociâls, storichis e linguistichis.

Lis prospetivis di ocupazion pai laureâts a son intes realtâts publichis e privadis che a operin a ducj i nivei (locâl, nazionâl e internazionâl), ta chês funzions che a domandin la cognossince des istituzions e normativis europeanis.

Achì la pagjine par notâsi ae presentazion.

Achì la pagjine cun dutis lis informazions sul cors.