Trê grups e dôs cjantantis a cjalcjaran il palc dal concierton de setime edizion di Suns Europe, in program te Place dal Cjistiel di Udin sabide ai 31 di Lui aes 9 sot sere.

Une serade siore di musiche e sonoritâts di grande cualitât che e viodarà sunâ i furlans Brût & Madone, cul lôr metalcore che al sdrondene lis orelis e dulà che si struchin e si misclicin death metal e punk hardcore, i faroês Land of Maybe, bogns di componi tocs pop che a àn intor i colôrs cjalts dal jazz nordic plui fin, e i Liher, grup basc une vore famôs che al duetarà cu la vôs mo cjalde, mo gherbe di Lide Hernando.

A cheste liste za siore di melodiis e gjenars diferents si zontaran la tradizion sarde, eletroniche e folk di Daniela Pes, une des vôs plui origjinâls de musiche sarde dal dì di vuê che adun cul pianist Mario Ganau a ufrissaran une grampe di baladis incjantadoris dal savôr eletroacustic fûr dal spazi e dal timp, e lis elegantis cjançons pop di Ursina, dulà che al travane a clâr l’amôr pe lenghe, pai paisaçs e pai suns des sôs monts tal Cjanton dai Grisons. Tocs che a fevelin di amôr, lûcs, personis e sperancis bandonadis e di trop che al sedi biel e sante scugne pierdisi in lôr.

La jentrade al conciert e je libare ma al covente notâsi li di cheste direzion web.

In câs di ploie, il conciert si fasarà tal Teatri Nuovo “Giovanni da Udine”.