Miercus ai 18 di Otubar, a 9 sot sere, tal Teatri Palamostre di Udin e sarà rapresentade la opare di Carlo Tolazzi e Davide Pitis “Qui tollis peccata mundi”.

Il Centri interdipartimentâl pal svilup de lenghe e de culture dal Friûl (Cirf) dal Ateneu furlan al à volût tornâ a puartâ in sene cheste opare rapresentade pe prime volte tal 2010 e mai plui replicade.

Il spetacul culturâl (melolic) "Qui tollis peccata mundi" al è un progjet metût adun inte suaze des iniziativis su la lenghe furlane previodudis dal finanziament de Leç Regjonâl N. 2/2011.

L'event al è a jentrade libare par ducj.

La forme dramatiche dal melolic, dal titul "Qui tollis peccata mundi”, e previôt une vôs recitante (di un atôr), un côr, dai strumentiscj e un diretôr di orchestre par un totâl di 21 personis che e partecipin ae metude in sene de opare. Il melolic al è un gjenar musicâl nassût tal secul XVIII, che al met adun la musiche cul fevelât: une composizion artistiche dulà che la recitazion di un test leterari e je compagnade de musiche.

La dramaturgjie e je ambientade in Friûl tal secul XVI. La vicende e riflet la vivacitât e i contrascj che a esistevin in Friûl, e in particolâr a Udin, dal pont di viste religjôs, culturâl, musicâl cuntun riferiment particolâr a Giorgio Mainerio, mestri di capele tal Domo di Udin.

La musiche origjinâl componude dal mestri Davide Pitis e rivoche e e compagne cun sugjestions impuartantis la azion dramaturgjiche. Il melolic si tignarà sedi par furlan che par talian.

La vôs recitante di Maurizio Fanin e sarà compagnade dal Ensemble de Filarmoniche dal Friûl Vignesie Julie e dal Côr “G. Pressacco” de Universitât dal Friûl, sot la direzion dal mestri Davide Pitis che al è ancje autôr des musichis.

Carlo Tolazzi al è dramaturc, scritôr e senegjatôr. I siei dramis si ispirin ae storie e aes tradizions popolârs cjargnelis e regjonâls, tra chescj o ricuardìn il monolic ‘Resurequie’ (su la tradizion dai “santuaris dal respîr”), ‘Cercivento’ (sul episodi dai soldâts fusilâts cuintri justizie te Grande Vuere), ‘Indemoniate’ (scrit a cuatri mans cu la atore Giuliana Musso), ‘Portare’ (dedicât aes puartadoris cjargnelis), ‘Tunnel’, ‘Trieste, una città in guerra’ e altris. Al à scrit ancje la senegjadure dal film ‘Carnia ’44. Un’estate di libertà’.

Tolazzi al à vinçût i premis plui impuartants pe narative in lenghe furlane, e doi concors nazionâi di narative par talian. Al è te jurie dal premi leterari in lenghe furlane ‘San Simon’. Tal 2021 al à publicât cun Kappa Vu ‘Il furlan Queneau ti stufe’, libri dedicât ai zûcs di peraulis par furlan.

Davide Pitis si è diplomât in composizion cul vôt plui alt e la laude li dal conservatori Jacopo Tomadini di Udin. Al à frecuentât i cors pai zovins diretôrs di orchestre de Fondazion Arturo Toscanini di Parma e al è stât segnalât e premiât in diviers concors di composizion nazionâi e internazionâi.

Al à colaborât tant che diretôr cun orchestris talianis e europeanis. Lis sôs composizions, sedi di cjamare che sinfonichis a son stadis eseguidis in Italie e tal forest in cetancj festivai musicâi internazionâi.

Al à lavorât cun autôrs innomenâts e cun diviers regjiscj talians pe realizazion di spetacui teatrâi, dulà che al à curât la composizion e la realizazion de part musicâl (Elio Bartolini, Carlo Sgorlon, Pierluigi Visentin, Quirino Principe, Paolo Patui, Gigi Dall’Aglio, Giovanni Battista Storti, Claudio De Maglio…).