«Cjâr De Mauro, tu tu riducis, ma crôt che ’l furlan al merte». Cun chestis peraulis, tal Setembar dal 1975, Agnul di Spere (Sedean, 1930 - Codroip, 2005) al dedicave al amì Tullio De Mauro, in chê volte ancjemò inciert su lis potenzialitâts de lenghe furlane, une copie de sô racuelte poetiche Semantiche dal flaut.

La convinzion che la lenghe furlane e meretàs no dome impegn, ma ancje afiet, e soredut inteligjence creative e ispirade, e à acompagnât l’inzegnîr furlan za dai agns de sô esperience di lavôr in Svuizare, li che al à podût madressi il so interès pes lenghis mancul pandudis. Di chel moment la sô ativitât di scritôr e cjatà il mût di esprimisi in formis svariadis: intune produzion in viers e in prose di fisionomie origjinâl, te traduzion e tal dialic costant cum altris leteraturis, intune ativitât editoriâl vivarose e indreçade ae cognossince mutuâl tra diviersis esperiencis poetichis, massime tra chês par furlan e chês par rumanç, e alfin intune ativitât significative di ricercje e riflession lessicografiche.

Dai contribûts dâts dongje intal volum, par talian e par furlan, dedicâts a ducj i cjamps li che Pitane al à spindût lis sôs energjiis, e ven a flôr cun limpidece la personalitât di un dai protagoniscj dal rinovament leterari furlan dai agns Setante in ca.

Intervents di:

• Anna Bogaro - Agnul di Spere om e poete 
• Mevina Puorger - Punts Ladin Friulanas: Agnul in Svuizare 
• Donato Toffoli - La prose furlane di Agnul di Spere 
• Maria Cristina Cescutti - Pittana, lis traduzions 
• Sandri Carrozzo - L'amôr pe lenghe a traviers dal amôr pes peraulis

Titul: Agnul di Spere inzen e lenghe / Angelo Michele Pittana ingegno e lingua
Curadôr: Gabriele Zanello
Editôr: Forum
Lûc di publicazion: Udin
An di publicazion: 2025
Golaine: Cuaders dal CIRF
Formât: cm 17x24; pagjinis 128 
ISBN: 978-88-3283-584-7