Suns Europe al va dilunc cun altris concierts une vore interessants.

Si tache domenie ai 25 di Lui aes 9 sot sere a Cuel di San Martin di Dartigne dulà che a sunaran i furlans Drumlanduo (Marco d’Orlando e Laura Giavon) e la ecletiche faroese Dania O. Tausen. I prins a son tra i rapresentants cun plui sgrimie dentri de gnove gjenerazion jazz e improvisative de nestre tiere e intai lôr concierts a messedin la tradizion popolâr cence nissune pôre, sperimentant cun cjâf e cun ironie.

Dania e je invezit une zovine cjantautore e poete indotade di une personalitât artistiche viamente. Il so univiers sperimentâl e scalembri al cimie al cjantautorât eletronic e low-fi, e al è segnât de sielte di doprâ cun cussience e braùre la sô lenghe proprie. La artiste faroese e sunarà ancje il dì dopo, ven a stâi lunis ai 26 di Lui aes 9 sot sere te Cort de Cjase de Musiche di Puçui.

Ai 30 di Lui, alfin, al tocjarà a un altri grup des Isulis Føroyar, i Land of Maybe, bogns di componi tocs pop che a àn intor i colôrs cjalts dal jazz nordic plui fin, e a la vôs di Daniela Pes, che a mieç tra tradizion sarde, eletroniche e folk, e je une des rapresentantis plui origjinâls de musiche sarde dal dì di vuê. Chescj concierts si fasaran a Lavarian aes 9 sot sere te Cort di Via Canonica 25.

La jentrade ai trê events e je libare ma al covente notâsi: pal conciert dai Drumlanduo e di Dania O. Tausen dai 25 di Lui li di cheste direzion web, pal secont di Dania O. Tausen dai 26 di Lui li di cheste e par chel dai 30 di Lui dai Land of Maybe e di Daniela Pes li di cheste altre.