Iniziative de Filologjiche pai 50 agns dal taramot
Friûl 1976: une comunitât che e torne a nassi - Racuelte di fotografiis
L’an cu ven a colin i 50 agns dal taramot dal Friûl: ai 6 di Mai dal 1976, aes 9 di sere, l’orcolat al sdrumà cjasis e paîs intîrs, savoltant la vite dai Furlans. Ma, jenfri lis maseriis, al nassè alc di straordenari: une comunitât unide, buine di frontâ cun fuarce e dignitât une des tragjediis plui grandis de storie taliane dopo de seconde vuere mondiâl.
Dopo dal taramot il Friûl al è deventât un esempli di partecipazion democratiche, di buine politiche e jutori concret. I citadins a son stâts protagoniscj in prime persone de ricostruzion, che e à savût tornâ a dâi vite no dome aes cjasis e ai paîs, ma soredut ai rapuarts sociâi.
Par ricuardâ e rindi onôr a di cheste straordenarie stagjon, la Societât Filologjiche Furlane e à inviât il progjet Friûl 1976: une comunitât che e torne a nassi cun chê di meti adun un archivi de memorie de ricostruzion dal taramot: no maseriis, duncje, ma imagjins di paîs, scuelis, glesiis, comunitâts e relazions che a tornavin a nassi, ancje in gracie di cui che al vignive di altris regjons de Italie e dal forest a dâ une man, fasint nassi amiciziis che salacor a son duradis dute une vite.
La Filologjiche e domande duncje ai Furlans di meti a disposizion lis lôr fotografiis, che salacor a son dismenteadis dentri di cualchi scansel o tignudis di cont intun album di famee, par che a deventin patrimoni di une storie di comunitât che e à dât un contribût fondamentâl ae nestre identitât furlane. Nol covente che a sedin fotografiis professionâls: o cirìn la testemoneance di musis, mans, modons, gjondis e fadiis di une comunitât segnade, ma che à savût tirâsi sù.
La volontât e je chê di meti sù tal 2026 une mostre pai 50 agns dal taramot e di stampâ un catalic: une maniere par rindi onôr a cui che si è cjatât a vivi chei agns e ae fuarce di une comunitât che e à savût tornâ a nassi.
Par informazions clamâ o scrivi a la Biblioteche de Filologjiche in vie Manin 18 a Udin, vierte dal lunis al vinars des 10 a misdì e mieç e des 3 aes 6 daspò misdì (tel. 0432 501598 int. 2, biblioteca(at)filologicafriulana.it).
