Inte ufierte formative dal Dipartiment di Siencis Juridichis (DISG) de Universitât dal Friûl, inte suaze des ativitâts didatichis che a puedin jessi sielzudis dai students dai cors di lauree di aree juridiche (Jurisprudence, Dirit pe inovazion di impresis e aministrazions publichis e Dirit pes impresis e pes istituzions), al è ancje par chest an un cors dedicât ae tutele des minorancis e dai dirits linguistics in Europe. 

Cheste ativitât  si davulezarà dai 3 ai 17 di Mai a Udin li dal Pôl Economic e Juridic di Vie Tomadini 30/a. Il seminari al ven inmaneât in graciis de colaborazion cul Centri Interdipartimentâl pal disvilup de lenghe e de culture dal Friûl (CIRF) dal Ateneu, e al è struturât in cinc incuintris in presince (cuatri lezions e l'esam finâl) par un totâl di dodis oris.

La sô frecuence e il superament dal esam a permetin ai students dai cors di lauree dal DISG di vê il ricognossiment di un credit formatîf (CFU). Il stes cors al è viert ancje ai students di chei altris Dipartiments, ancje se in chest câs nol è previodût il ricognossiment dal CFU.

Il cors, che al vignarà tignût di Marco Stolfo, al jere za stât metût adun pe prime volte tal an academic 2020/2021, dentri dal progjet ECCA (European Charter Classrom Activities), promovût dal NPLD, la rêt europeane pe promozion de diversitât linguistiche, che di chê e fâs part, midiant dal CIRF, ancje la Universitât dal Friûl.

Dutis lis informazions in cont dal program, dai oraris di lezion e dal esam finâl si cjatin culì.

Par notâsi al covente fâ indenant la domande di iscrizion ae direzion di pueste eletroniche didattica.disg(at)uniud.it dentri di misdì dai 28 di Avrîl.