Vinars ai 21 di Otubar a Udin si provarà a fâ il pont de situazion in cont de tutele des minorancis linguistichis inte regjon che e ten dongje la plui part dal Friûl e la zone di Triest.

L'apontament al è a tacâ di 9 e mieze a buinore tal Auditorium Comelli dal palaç de Regjon Friûl-VJ (vie Sabbadini 31) là che par iniziative dal Consei Regjonâl si davuelç une taule taronde su promozion e valorizazion des minorancis.

In continuitât cu lis conferencis regjonâls fatis tal 2021 par ognidune des trê comunitâts (furlans, slovens e gjermanics), vie pe zornade al sarà un confront in cont des diviersis realtâts e dal lôr avignî, tra programazion e politichis linguistichis.

Si podarà stâ daûr dai lavôrs sei in presince che midiant dal streaming sul sît istituzionâl dal Consei regjonâl. Dutis lis informazions si cjatin culì.